Editorial nga Gijotina.com
Qeveria ka rikthyer projektin e saj të vjetër të amnistimit të parave dhe aseteve të padeklaruara. Vlerësimet e institucioneve ndërkombëtare për ekonominë informale në Shqipëri dhe të shqiptarëve në botë janë të frikshme. Të dhënat e raportit “Quarterly Informal Economy Survey (QIES) nga Ëorld Economics e nxjerrin nivelin e ekonomisë së pataksuar dhe të pamonitoruar nga qeveria në 32%. Vlera monetare e këtij niveli të informalitetit përllogaritet 17 miliard dollarë. Vëllimi total i ekonomisë vjetore, sipas CIA Factbook është rreth 38 miliard dollarë.
Po pse po e shtyn përpara këtë draft qeveria? A e ka kërkuar komuniteti i biznesit? A është kërkuar nga komuniteti i dipasporës shqiptare? A i ka arritur Shqipëria standardet europiane të kontrollit dhe luftës ndaj pastrimit të parave? Me çfarë kapacitetesh do ta filtrojë administrata tatimore kapitalin gri, duke ndarë prej tij paratë dhe asetet me burime kriminale?
Asnjë përgjigje nuk ka për këto pyetje dhe nuk do të ketë. Sepse qëllimi i amnistisë së propozuar nga qeveria është tjetër. Në Shqipëri tashmë kanë hyrë miliarda dollarë më burim nga ekonomia e zezë e trafiqeve dhe mafias ndërkombëtare. Raporti i Global Initiative i vitit 2020 tregoi se rreth 600 milion euro në vit pastroheshin në sektorin e ndërtimit në Tiranë, ndërsa hetimet e prokurorisë italiane të antimafias provuan lidhjet e Ndragheta-s me bashkinë e Tiranës dhe investimet e saj në ndërtim.
Pra, paratë që qeveria synon të amnistojë janë përdorur tashmë dhe janë bërë beton e hekur në Tiranë. 5 milion m2 ndërtim që është dhënë në Tiranë që nga vitit 2015, me një kosto mesatare prej 400 euro/m2 kanë një kosto totale prej 2 miliard eurosh. Cili është burimi i këtyre parave? Bilancet e kompanive dhe marrëveshjet e tyre të kreditimit me bankat nuk mbulojnë dot as gjysmën e këtyre fondeve. Burimi sigurisht që është paraja e zezë e trafiqeve.
Në këtë projekt të qeverisë, Erion Veliaj dhe ekipi i tij në krye të Bashkisë së Tiranës kanë luajtur një rol qëndror. Ata kanë krijuar mundësitë dhe kanë hapur rrugët që në Tiranë të pastroheshin miliarda euro të ardhura nga trafiku ndërkombëtar i drogës. Aministia fiskale vetëm sa do t’i legjitimojë ato asete. Pra, çunat e drogës, të Ndragheta-s, Sacra Corona Unita-s, etj, do të deklarojnë me lehtësi pronësinë e miliona m2 apartamente, dyqane, hotele e qendra tregtare që kanë financuar deri sot pa u shqetësuar nga organet e parandalimit të pastrimit të parave.
Taksa 5 apo 7% për asetet e deklaruara për legalizim është një tjetër dhuratë që u bëhet klientëve të Erion Veliajt dhe lejeve të tij të ndërtimit. Ajo është një taksë simbolike, e krahasueshme me fitimet e vetëm një viti nëse ato para do të përdoreshin në biznesin me normën më të ulët të fitimit: bonot e thesarit.
Çunat ia bëjnë hallall Lali Erit fitimin e një viti, pas gjithë atyre fitimeve shumëfish që kanë marrë nga financimi i ndërtimeve dhe çmimet stratosferike të apartamenteve në Tiranë./Gijotina.com
Discussion about this post