Ish-ministri Edmond Panariti ka komentuar sot draftin për amnistisë fiskale, i cili lejon deklarimin vullnetar të një pasurie në vlerë monetare deri në 2 milionë euro, te cilat me pas tatohen nga 7-10 %. Në një postim në rrjetet sociale Panariti thotë se përmes këtij projektligji, kushdo që ka 2 milionë euro pasuri që e ka vënë në mënyrë të paligjshme, mund ta bëjë tashmë të ligjshme dhe ta depozitojë në bankë, pa pasur nevojë të sqarojë origjinën e tyre.
“Kuptoj që detyrohet sistemin bankar, të shkelë mbi praktikat dhe procedurat ligjore të kontrollit të origjinës dhe parandalimit të transaksioneve të dyshimta, për të kulluar tashmë me ligj ujërat e zeza të parave të trafiqeve. Pra dhe i ndalon dhe i lejon, njëkohësisht”, shkruan ai.
Sipas tij, me këtë ligj qeveria kërkon të bëjë të zezën të bardhe, duke i dhënë kështu më shumë hapësirë të korruptuarve dhe kriminelëve.
“Kuptoj, që e zeza, bëhet e bardhë me ligj, po me anë të parave. Kuptoj që e gjithë historia për detyrimin e deklarimit të origjinës së pasurisë, thelbi i së cilës ishte dhe mbetet parandalimi i shpëlarjes dhe ndalimi i zbardhjes së parasë së pistë të drogës, trafiqeve etj, shndërrohet në një farsë”, shkruan ai, duke theksuar se ky draft është hartuar për të ndihmuar oligarkët.
Discussion about this post