Aleanca për Mbrojtjen e Teatrit, me përfaqësuese juristen Adriana Kalaja, në një deklaratë për shtyp u shpreh se është dërguar një kërkesë ankimore për mosfillimin e hetimeve nga SPAK lidhur me të gjitha kallëzimet e bëra deri më tani.
Kalaja theksoi se kallëzimi për ministren e kulturës Elva Margariti, nuk është marrë në shqyrtim, ndërkohë që padia ndaj saj është dorëzuar që në korrik të këtij viti.
Ky kallëzim ka ardhur pasi dy artistë, teksa iu drejtuan institucionit që ajo drejton, për të dorëzuar një kërkesë për zbatimin e vendimit, nuk janë lejuar të hyjnë brenda, gjë e cila shkaktoi dhe tensione mes artistëve dhe rojeve.
Kalaja tha se Ministria Margariti, në bashkëpunim me punonjësit e policisë, ka shpërdoruar detyrën dhe se SPAK akoma nuk ka dhënë një përgjigje për dosjen e teatrit dhe nuk dihet nëse ato vendime kanë kaluar për gjykim, janë zgjatur apo janë pushuar.
Ajo u shpreh se Aleanca është e vendosur për t’i shkuar çështjes deri në fund dhe u bëri thirrje ambasadorëve te huaj të mos ndërhyjnë në sistemin gjyqësor.
