Lista Serbe, që përfaqëson komunitetin serb ën Kuvendin e Kosovës ka bojkotuar tri mbledhjet e fundit të kryesisë, duke pamundësuar kuorumin e nevojshëm për të marrë vendimin për caktimin e seancës së radhës. Këtë veprim analistët politikë në Kosovë e quajnë si shantazh që vjen nga Beogradi zyrtar për Asocacionin.
Artan Muhaxhiri dhe Ognjen Gogiq shprehen se Lista Serbe është themeluar dhe mbështetet nga Beogradi zyrtar, nga i cili edhe merr instruksionet për veprimet që bën, prandaj dhe përdoren për arsye personale.
Më 17 tetor, kur Lista Serbe nga Mitrovica e Veriut shpalli fitoren në zgjedhjet lokale në komunat me shumicë serbe, kryetari i këtij subjekti politik, Goran Rakiq deklaroi se lufta e kësaj partie është e përqendruar në formimin e Asociacionit të komunave me shumicë serbe. Në kudër të kësaj deklarate dhe ndodhive të fundit, dy analistët shprehen se çdo veprim i Listës Serbe duhet marrë në konsideratë për t’i paraprirë dëmeve më të mëdha. Analisti Muhaxhiri thotë se veprimet përfaqësuesve të Listës Serbe, fillimisht në kryesinë e Kuvendit, janë sinjale që ka nisur të ndjekë politikat e bojkotit ndaj institucioneve të Kosovës. Por, sipas tij, veprimet e Listës Serbe, marrë parasysh mbështetjen ekskluzive që merr nga Beogradi zyrtar, janë të instrumentalizuara dhe të diktuara nga ky i fundit.
“Po, këto janë indikacione, por vendimi definitiv për bojkotimin ose jo të punës së Kuvendit dhe të Qeverisë nga ana e Listës Serbe do të merret pas një koordinimi me faktorët relevantë që kanë ndikim në vendimmarrjen dhe funksionimin e kësaj liste. Asnjë vendim i Listës Serbe nuk duhet të konsiderohet si vendimmarrje tyre, por si një instruksion që vjen nga Beogradi”, thotë Muhaxhiri.
Discussion about this post