Lubonja për median italiane: Kërkojmë largimin e Ramës dhe një qeveri teknike për zgjedhje vërtet të lira

Shkrimtari dhe publicisti Fatos Lubonja ka folur për median italiane në lidhje me protestën e njohur me emrin Revolucioni i Flamingove.

Lubonja ka shpjeguar për portalin ‘La Via Libera’ se kërkojnë dorëheqjen e Edi Ramës dhe krijimin e një qeverie teknike që do të organizojë zgjedhje vërtet të lira.

Më poshtë pjesë nga intervista e Lubonjës.

Duke u kthyer te protestat, çfarë kërkoni?

Së pari, dorëheqjen e qeverisë.

Më pas:

-krijimin e një qeverie teknike për një vit, që do ta çojë vendin drejt zgjedhjeve vërtet të lira;

-vendosjen e kufirit prej dy mandatesh për kryeministrin (Rama është në mandatin e katërt);

-ndryshimin e ligjit për financimin e partive politike;

-rikthimin e ligjit që mbron zonat e mbrojtura;

-shfuqizimin e ligjit për “investimet strategjike”, sipas të cilit shteti u garanton investitorëve privatë që investojnë më shumë se 10 milionë euro në territorin shqiptar lehtësi fiskale dhe u siguron infrastrukturë, rrugë dhe energji elektrike.

(Javën e kaluar Rama deklaroi se synon t’i rishikojë këto dy ligje, shënim i redaksisë.)

Ata e quajnë këtë zhvillim. Për ne është shpronësim dhe shkatërrim i pasurive të përbashkëta dhe natyrore.

Çfarë të ardhmeje shihni për këtë lëvizje?

Fatkeqësisht, nuk jam optimist.

Nëse shohim historinë e Shqipërisë, ndryshime të rëndësishme si ato që kërkojmë sot kanë ardhur vetëm si rezultat i ndryshimeve të mëdha në nivel ndërkombëtar.

Nuk mund të shpresojmë as për ndihmë nga Italia, duke qenë se Giorgia Meloni, kur emisioni Report publikoi një investigim mbi lidhjet mes politikës, ndërtimit dhe krimit, e akuzoi emisionin se po e paraqiste Shqipërinë si një narko-shtet dhe i shprehu solidaritet Edi Ramës.

Pa një ndërhyrje të fortë politike nga jashtë, që t’i japë mbështetje protestës dhe drejtësisë, e cila duhet të hetojë këto çështje, nuk shoh mundësi për ndryshim.

Gjithashtu duhet të krijohet një mbështetje sa më e gjerë, duke përfshirë gjithnjë e më shumë njerëz.

Ndërkohë, protestat po dobësohen, për shkak të vapës, lodhjes dhe përçarjeve të brendshme.

Protesta mund të jetë fillimi i ndërtimit të një alternative politike, por hapi i parë duhet të jetë dorëheqja e kësaj qeverie.