Kreu i Emergjencave Civile, Haki Çako ka qenë këtë të enjte në qytetin e Vlorës ku ka zhvilluar një takim me prefektin Flamur Mamaj.
Në këtë takim ato kanë bërë një analizë në lidhje me bilancin e dëmeve të shkaktuara nga zjarret Vlorë në periudhën pranverë-verë 2021. Çako tha se ndonëse kapacitetet në dispozicion ishin të mjaftueshme, shtoi se gjithsesi janë të papërgatitur për të përballuar zjarret.
“4% e buxhetit të Bashkive duhet të shkoj për zjarrfikëset gjë që nuk ka ndodhur. Agjencia jonë po punon me një projekt me Italinë për të ndihmuar me mjetet zjarrfikëse. Do punohet edhe me stafet e zjarrfikëseve për trajnimin e tyre. Kapacitete e vëna në dispozicion nga Agjencia kombëtare ishin në maksimum, prap ne jemi të papërgatitur për të përballuar zjarret. E pamundur menaxhimi në territoret kodrinore, malore. Kërkohet bashkëpunim me komunitetet në rastet e zjarreve”.
Nga ana tjetër, prefekti Mamaj tha se në total janë djegur 4803 ha tokë, ndërsa kritikoi bashkitë për mungesën e sistemit të informimit dhe njoftimit.
“4803 ha toka të djegura. Mungon hartimi i dokumentit të dëmeve nga Bashkitë dhe informimi i rrezikut nga zjarri. Mungon sistemi i monitorimit dhe njoftimit të hershëm. Mungojnë të dhënat për ata që angazhohen për shmangien e fatkeqësive. Nuk ka veshje, kundra gaz as për zjarrfikësit. Mungon logjistika. Asnjë zjarrfikëse nuk ka radio komunikimi për bashkëlidhje. 13 çështje të zbardhura, 7 të arrestuar për zjarret, 6 të proceduar në gjendje të lirë dhe 1 në kërkim”, ka thënë Mamaj.
Çako gjithashtu është shprehur se është e domosdoshme nxjerrja e analizave të bashkive në lidhje me dëmet e shkaktuara nga zjarret.
