Në ambientet e Kuvendit është zhvilluar seanca dëgjimore me disa prej kandidatëve të vetë ofruar për dy vakancat e shpallura, në Këshillin Mbikëqyrës të Bankës së Shqipërisë.
Pjesë e kandidaturave ishte dhe ish-deputeti i PS Anastas Angjeli, i cili u shpreh se po kandidon për shkak se me përvojën e tij mund të ndihmojë në ndryshimin e kuadrit ligjor të Bankës së Shqipërisë.
“Mendoj që një kontribut që mund të japë është përmirësimi i kuadrit ligjor të Bankës së Shqipërisë. Ligji për Bankën e Shqipërisë është që nga viti 1997, pra për çerek shekulli nuk ka ndryshuar dhe ka nevojë të përmirësohet. Përmirësime të tjera janë rritja e autonomisë e bankës së Shqipërisë, duke e bërë atë më të pavarur nga ato që parashikon Kushtetuta. Gjithashtu ka disa akte të tjera nënligjore që kanë të bëjnë me auditin e brendshëm edhe ato duhet të përmirësohen. Dhe dy elementë të tjerë janë transparenca, që duhet të bëhet në përputhje me legjislacionin në vendit tonë dhe siguria kibernetike”, tha Angjeli.
Kandidatura e Angjelit mori mbështetjen e deputetit të PD-së në komisionin e Ekonomisë, Edmond Spaho, i cili tha se kjo është një kandidaturë ekselente.
Discussion about this post