Shumë çudira do të dëgjojmë derisa të mbarojnë zgjedhjet vitin e ardhshëm! E keni vënë re që në javët e fundit janë zgjuar edhe kryetarët e bashkive të vogla që deri me sot flinin dhe tashmë po bëjnë tenderë për fasada dhe rrugë?!
Kështu, kryetari i Bashkisë Cerrik, Andis Salla, deri më sot nuk është ndjerë për ndonjë investim tek ky qytet i vogël që ka vetëm 46 652 banorë. Ndërsa tani kryetari është hedhur në veprim. Kryetari Salla ka vendosur të shpenzojë para për të mirëmbajtur rrugët që të çojnë nëpër ara. Sipas të dhënave të tenderit bëhet fjalë për pastrimin e dherave nga rrëshqitja dhe mbushja e gropave aty ku ka dëmtime. Në total janë16 km rrugë.
Do të ketë vetëm 10 ditë punë, pasi ka nevojë për pak ndërhyrje dhe këtë e thotë vetë relacioni i projektit.
“Ndërhyrja në ketë rrugë bëhet e domosdoshme për shkak te gjendjes ekzistuese e cila ka dëmtim te shtresave ne gjithë gjatësinë e saj. Rrugët që do të propozohen për rehabilitim dhe mirëmbajtje janë rrugë të niveleve të ndryshme si rruge kodrinore, malore dhe fushore. Në disa fshatra kemi të bëjmë dhe me rrugë me pak pjerrësi të cilat kanë nevoje për pak rehabiltim. Gjendja ekzistuese është trase e deformuar me gropa”.
Tenderi pa garë
Por për këto 10 ditë punë operatori privat do të paguhet 100 milionë lekë nga arka e bashkisë. Janë shumë shpenzime për aq pak punë, por Salla ka menduar edhe për veten e tij. Prandaj më tutje ai ka shkelur ligjin që të ndajë paratë me firmën që ka thurur aferën në prapaskenë.
Shohim që vetëm bashkimi i operatorëve EN-SAL & S I R E T A 2F kanë dorëzuar një ofertë. Në këtë situatë ligji thotë shumë qartë që tenderi duhej të ishte anuluar për mungesë të konkurrencës.
Por, kjo mungesë konkurrence i bën përshtypje Sallës dhe pa e zgjatur shumë ka shpallur fituese ofertën e vetme.
Për këtë shkelje Open Data Albania i ka vendosur tenderit Flamurin e Kuq, që është shenja e riskut të korrupsionit.
Gjithashtu përbën shumë rëndësi fakti se me kë po bën Pazar kryetari. Dhe përgjigja dihet: me një nga të privilegjuarit nëpër tendera, që këtë herë është Fiqiri Pali.
S I R E T A 2F është themeluar nga Fiqiri Pali. Por, më datë 15 maj të vitit 2008, me anë të kontratës së shitjes së kuotave të kapitalit, Fiqiri Pali i ka shitur 100% të kuotave me vlerë 100 mijë lekë bashkëshortes Fatime Pali.
Pra, kjo kompani që xhiron miliarda lekë është shitur vetëm për 100 mijë lekë.
Pali bëri këtë lëvizje sepse arrestua dhe u dënua në vitin 2008, si pjesë e një skeme korrupsioni, ku vidheshin paratë publike me tenderë abuzivë. Skema funksiononte me disa institucione, por policia dhe prokuroria dokumentoi një aferë me Ministrinë e Punës dhe Shanseve të Barabarta. Fiqiri Pali, në bashkëpunim me Llambi Tarka, u akuzuan në atë kohë se korruptuan zyrtarin e lartë të Ministrisë së Punës dhe Shanseve të Barabarta, Spartak Gjini, duke paracaktuar tenderin e rikonstruksionit të ministrisë dhe duke ndarë fitimet bashkë.
Pali u dënua në 2 maj të vitit 2008. Dënimi i tij është konfirmuar nga Gjykata e Apelit dhe më pas nga Gjykata e Lartë. 12 ditë më pas ai shiti aksionet tek e shoqja, për të shpëtuar kompaninë.
Epo, me këto me dosje të errëta po i bën tenderat elektoralë Rilindja!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post