Më 25 nëntor, Agron Kapllanaj, deklaroi se ai ishte emëruar në krye të degës së Fierit, post i cili mbahej nga Luan Baçi. Brava e selisë u ndërrua dhe Kapllanaj tha se procesverbalet dhe çelësat e zyrës i janë dorëzuar nga përfaqësuesit e PD konform të gjitha procedurave.
Ndërrimi i bravës së derës në zyrën e PD në Fier u referua si çështje në Polici nga sekretari i PD-së Emiljano Mone. Luan Baçi në një intervistë për mediat u shpreh se nuk kanë shkuar më në seli qëkur është ndërruar brava.
“Unë jam bërë një mburojë për mos shkuar për arsye se kisha një irritim ato ditë. Ne nuk mund të përgjigjemi me një njëjtën monedhë që bëjnë 2-3 veta tek kryesia e PDSH, duke bërë një veprim të pafalshëm, prej ordinerësh do ta quaja. Pak rëndësi ka se zyrat i kanë bllokuar, pak ditë do të jenë këto sepse me mbarimin e Kuvendit të 11 dhjetorit është e garantuar që ato zyra do t’i kthehen anëtarëve të PD, strukturave të PD-së dega Fier” – tha Baçi.
Baçi u shpreh se anëtarësia nuk shkon në seli. Ata e kanë ndërruar bravën, por gjithë strukturat e PD-së, nënkryetarët, sekretariati i PD-së, kryetarët e grup-seksioneve, sekretaret janë ata që kanë firmosur në shumicë formularët e 11 dhjetorit dhe nuk e njohin fare këtë zëvendësim që është bërë, madje nuk njohin as kryetarin e PD-së Lulzim Bashën.
Sipas zotit Baçi, Basha nuk ka të drejtë të emërojë një kryetar të ri dege, ai zgjidhet me votën e demokratëve.
“Kur dega e Fierit kaloi në mbështetje të Foltores së Berishës për të mirën e PD-së, kryetari Basha nxjerr asin nga mënga dhe thotë unë do të bëj një komandim aty se nuk më përgjigjet kryetari i degës dhe gjithë anëtarësia. Ai i ka hapur luftë gjithë anëtarësisë dega Fier. Unë kam qenë mbështetës kryesor i Bashës në 8 vite se e shikoja që ishte kryetar i PD dhe duhet të vinim në pushtet. Por pas 4 humbjeve rresht, pas humbjes spektakolare në 25 prill janë drejtuesit ata që mbajnë përgjegjësi edhe kur vidhesh” – tha Baçi.
Baçi u shpreh se janë në borxh me demokratët dhe nuk duhet të veprojnë duke mbajtur peng karrigen dhe vulën.
Discussion about this post