Pesë ditë nga zgjedhjet brenda PD-së për kryetarin e ri, Edith Harxhi ishte sot në Peqin në një takim me strukturat e partisë për t’i bindur që ta votojnë në datë 13 Qershor. Harxhi vendosi disa piketa të strategjisë së saj nëse i besohet drejtimi i së djathtës shqiptare.
“Sapo hyra këtu, zotëria më tha, çfarë të bëjmë ne, kemi 8 vite në opozitë? Anëtarësia është shumë e lodhur, prandaj kam kërkuar zgjatjen dhe jo afrimin e procesit të zgjedhjeve në parti. Partia duhet të bashkohet me vepra jo me fjalë, se kanë ikur shumë.
Duhet ta bëjmë sikur bëri doktori në 2004-05, vetëm ajo na sjell në pushtet. Nuk mund të jetë kandidat për deputet një njeri që nuk ka lind në atë vend. Nuk mund të jetë dikush kandidat për kryetar bashkie dhe ta ketë shtëpinë në Tiranë. Ju keni pasur fatin që erdhi Dashi (Dashnor Sula) këtu, se mund të kishit përfunduar si Kavaja, Tepelena apo Saranda” tha ajo.
Takimi është shoqëruar me debate në strukturat e PD-së. “Pse nuk do të flasë asnjë kundër kryetarit? Jemi kthyer si në kohën e Enver Hoxhës” tha Harxhi.
Ndryshe nga takimet e tjera në degët e PD-së në rrethe, sot kryetari i Këshillit Kombëtar të PD-së, Bujar Nishani nuk ishte në krah të Edith Harxhit. Arsyen e mungesës e shpjegoi vetë Harxhi. “Më vjen keq që zoti Nishani sot nuk ishte në Shqipëri. Do të kthehet nesër në mbrëmje. Ka ikur dy ditë jashtë për arsye shëndetësore. Për këtë arsye nuk ishte këtu sot” tha ajo.
Në garë për postin e kryetarit të PD-së janë Lulzim Basha, Edith Harxhi, Fatbardh Kadilli dhe Agron Shehaj, ndërsa zgjedhjet do të zhvillohen në 13 qershor.
