Ministri Xhelal Sveçla së bashku me drejtues të policisë në Kosovë, kanë zhvilluar një vizitë disa ditore në Francë, ku duket se qëllimi i saj është forcimi i bashkëpunimit mes palëve.
Delegacioni nga Kosova realizoi disa takime të rëndësishme me personalitete të larta në Francë, ku Drejtori i Përgjithshëm i Policisë së Kosovës Samedin Mehmeti realizoi një takim të veçantë me drejtorin e policisë nacionale të Francës Jerome Leonnet.
Mehmeti në fjalën e tij pohoi se Kosova mbetet një partnere e besuar dhe bashkëpunëtore shumë e mirë e Francës. Në këtë takim, Kosova synon të jetë faktor stabiliteti në rajon dhe ashtu si sukseset e arritura në luftimin e krimit përmes ngritjes së bashkëpunimit, rezultatet e kësaj lufte do të jenë më të mëdha.
Kosova ndër të tjera ka kërkuar përkrahjen e Francës për anëtarësimin në INTERPOL dhe EUROPOL. Në këtë mënyrë do të luftohet edhe më tepër krimi i organizuar, si dhe do të rritet siguria në vend.
Në përfundim, drejtuesit francezë kanë konfirmuar marrëdhëniet shumë të mira mes dy vendeve, madje duke premtuar se bashkëpunimi do të jetë edhe më i madh në këtë “mision”. Do të punohet fort në luftëen kundër krimit, shtimin e sigurisë si dhe për ngritjen e kapaciteteve shtetërore.
