Anëtari i Këshillit të Lartë të Prokurorisë, Bujar Sheshi, ka deklaruar sot në mbledhjen e përbashkët me KLGJ problemet që po hasin këto institucione. Ai tha se sfida kryesore me të cilën po përballet sistemi aktualisht është mungesa a magjistratëve dhe pamundësia për të përmbushur detyrën e atyre që janë në sistem. Sheshi tha se aktualisht janë 121 vakanca prokurorësh dhe se ripërtëritja kërkon 5 vite.
“Shkaku kryesor vlerësohet të jetë procesi i vettingut që po vijon. 220 prokurorë aktualisht që ushtrojnë detyrën. 121 vakanca në total. Ripërtëritja e këtyre vakancave do të kërkonte 5 vite. Shqetësim paraqet edhe fakti që ende 152 prokurorë nuk kanë përfunduar procesin e vlerësimit kalimtar. KLP synon të orientojë shkollën në rritjen e kuotave të pranimit. Ky është proces delikat dhe pranimi duhet të bëhet pa cenuar standardin. Është një nga mundësitë që ne kemi parë për të zbutur sado pak efektet negative të momentit. Kandidatët për prokurorë duhet të kenë dhe pasionin dhe vullnetin për të punuar si prokurorë, jo të mbeten si prokurorë duke qenë se nuk mundën të kapnin kuotat për gjyqtar”, tha Sheshi, ndërsa kërkoi gjithashtu që kjo pikë të rishikohet edhe në hartën e re gjyqësore.
Discussion about this post