Lojtarët e Anglisë janë paralajmëruar se mund të përballen me një valë të madhe zhurme dhe presioni nga tifozët meksikanë kur të mbërrijnë në Mexico City, në prag të ndeshjes së Botërorit 2026.
Sipas raportimeve, Federatë Angleze të Futbollit nuk ka marrë masa të posaçme për të zbutur zhurmën, përveç pajisjeve standarde si tapa për veshët dhe maska për gjumë, që futbollistët i përdorin zakonisht gjatë udhëtimeve ndërkombëtare.
Tifozët meksikanë tashmë kanë treguar aftësinë e tyre për të krijuar atmosferë të tensionuar jashtë hoteleve të skuadrave kundërshtare. Në një rast të mëparshëm, ata përdorën fishekzjarrë, daulle dhe boritë e makinave për të shqetësuar gjumin e Ekuadorit në prag të një ndeshjeje të fazës së 1/16-ave. Ekuadori më pas humbi 2-0 dhe paraqiti ankesë zyrtare në FIFA për këtë sjellje.
Tani ekziston frika se e njëjta strategji mund të përdoret edhe ndaj Anglisë, e cila pritet të përballet me Meksikën në “Estadio Azteca”, një stadium i njohur për atmosferën e tij shumë të zjarrtë dhe presionin ndaj kundërshtarëve.
Skuadra e drejtuar nga Thomas Tuchel është në dijeni të situatës dhe po përgatitet për një pritje të vështirë në kryeqytetin meksikan. Madje, janë ngritur shqetësime se vendndodhja e hotelit të ekipit mund të zbulohet nga mediet lokale dhe të përhapet te tifozët.
Brenda ekipit anglez, lojtarët janë të pajisur me mjete për të fjetur më lehtë, përfshirë kufje kundër zhurmës dhe teknika relaksimi, ndërsa disa prej tyre përdorin edhe pajisje me zhurmë të bardhë për të përballuar ambientet e vështira gjatë udhëtimeve.
Ndërkohë, futbollistët që nuk luajtën në ndeshjen e fundit ndaj DR Kongos kanë vijuar stërvitjet në bazën e ekipit në Kansas City, ndërsa disa titullarë kanë kryer rikuperim fizik.
Anglia pritet të udhëtojë drejt Meksikës vetëm pak ditë para ndeshjes, edhe për shkak të lartësisë së madhe të Mexico City (rreth 2,200 metra mbi nivelin e detit), e cila mund të ndikojë në gjendjen fizike të lojtarëve.
Ndeshja ndaj Meksikës pritet të jetë një nga më të zjarrtat e fazës së turneut, ku atmosfera në tribuna mund të jetë po aq vendimtare sa edhe vetë loja në fushë.
Discussion about this post