Filipinet thanë të shtunën se kanë vërejtur një anije të forcave detare kineze dhe dhjetëra barka milicie përreth ishullit të kontestuar në Detin e Kinës Jugore, kur tensionet territoriale në atë zonë po rriten.
Roja bregdetare filipinase tha se 42 barka, të cilat besohet se ishin me personel të Marinës Ushtarake Kineze, janë parë afër ishullit Thitu, ndërsa një barkë dhe një anije e Rojës Bregdetare Kineze janë parë “duke bredhur ngadalë” në ujërat përreth, raporton agjencia “Reuters”.
Ambasada e Kinës në Manila nuk iu përgjigj menjëherë një kërkese për ta komentuar pretendimin e autoriteteve filipinase.
“Prania e tyre e paautorizuar është qartazi në mospërputhje me të drejtën për udhëtim të lirë dhe shkelje flagrante e integritetit territorial të Filipineve”- thuhet në një deklaratë të rojës bregdetare të këtij shteti.
Thitu, ishull që ndodhet në zinxhirin e ishujve Spratly, është pika më e madhe dhe më e rëndësishme në aspektin strategjik e Filipineve në Detin e Kinës Jugore, zonë ujore që në masë të madhe pretendohet nga Pekini e ku disa shtete kanë pretendime territoriale që bien ndesh me njëra-tjetrën.
Para dy javëve, presidenti i Filipineve, Ferdinand Marcos Jr, tha se Filipinet “nuk do të humbin një inç” të territorit, pasi vendet e Azisë Juglindore protestuan kundër “aktiviteteve agresive” të Kinës në det.
I njohur edhe si Pag-asa, ishulli Thitu shtrihet rreth 480 kilometra në perëndim të provincës perëndimore të Filipineve, Palawan. Në këtë ishull banojnë mbi 400 njerëz, përfshirë personelin e sundimit të ligjit dhe të ushtrisë.
Ekspertët thonë se flota e peshkimit dhe roja bregdetare e Kinës kanë rol qendror në ambiciet strategjike të saj në Detin e Kinës Jugore, duke mbajtur një prani të vazhdueshme që i ndërlikon peshkimin dhe aktivitetet energjetike të shteteve të tjera bregdetare.
Discussion about this post