Kreu i KZQ Ilirjan Celibashi iu ka bërë thirrje emigrantëve shqiptarë të cilët nuk janë kontaktuar nga kompania postare DHL me email apo sms, të kontaktojnë me shërbimin postar në vendin ku ata jetojnë dhe të informohen mbi dërgesën postare që përmban zarfin me fletën e votimit nga KQZ.
Sipas tij, mungesa e njoftimit apo kontaktimit nga DHL vjen për shkak të problemeve me adresën e banimit të deklaruar, e cila nuk përputhet me adresën aktuale në terren. Sipas tij një problematikë tjetër është përdorimi i numrave të kontaktit shqiptarë.
“Të gjithë ata zgjedhës nga jashtë, kudo në botë, por veçanërisht ata në Greqi, të cilët deri më sot nuk kanë marrë njoftim dhe/ose nuk janë kontaktuar nga DHL, qoftë nëpërmjet e-mailit apo nëpërmjet SMS-it, janë të lutur të kontaktojnë me shërbimin e DHL në vendin ku jetojnë, për t’u informuar mbi dërgesën postare nga KQZ.
Mungesa e njoftimit apo e kontaktimit të këtyre zgjedhësve deri tani nga DHL është kryesisht për shkak të problemeve me adresën e banimit të deklaruar në PER, e cila nuk përputhet me adresën aktuale në terren, ose për shkak të përdorimit të numrave të kontaktit shqiptarë, ku zgjedhësi nuk ka akses”, shkruan Celibashi.
Sipas të dhënave të deritanishme, në KQZ kanë mbërritur 144 783 zarfe zgjedhore. Greqia mbetet ende problematikë pasi kanë ardhur deri më tani vetëm 23 640 zarfe nga 68 380 të dërguara në total.
Partia Demokratike ka depozituar ankesa zyrtare pranë KQZ-së dhe kanë kërkuar marrjen e masave të menjëhershme për zgjidhjen e problemit me dërgesat e zarfeve për votuesit në diasporë. Rreth 20 mijë votues nuk kanë marrë ende zarfin me fletën e votimit.
Discussion about this post