Antimitingu në mbështetje të Veliajt, PD kërkon shkarkimin e Ervin Hoxhës dhe kryepolicit Proda: Ministri gënjeu

Partia Demokratike ka kërkuar shkarkimin nga detyra të ministrit të Brendshëm Ervin Hoxha dhe kryepolicit Ilir Proda pas reagimit të GJKKO. Gjykata e Posaçme konfirmoi se policia nuk mori asnjë masë sigurie gjatë protestës që u zhvillua dy ditë më parë në mbrojtje të kryebashkiakut Erion Veliaj, duke injoruar kërkesën e saj.

Në një reagim në rrjetet sociale, Bardhi kujton deklaratat e djeshme të Hoxhës në Kuvend për rastin dhe kërkon nisjen e një hetimi për ministrin e Brendshëm dhe Drejtorin e Policisë së Shtetit.

“Ministri i Brendshëm gënjeu dje publikisht dhe keqinformoi Kuvendin e Shqipërisë lidhur me mosveprimin e Policisë së Shtetit ndaj tentativës mafioze të drejtorëve batakçi të Bashkisë së Tiranës për të intimiduar fizikisht në krye të detyrës gjyqtarët dhe prokurorët e posaçëm. Ky mashtrim institucional dhe publik i Ministrit të Brendshëm provon edhe autorësinë e urdhrit politik për të penguar drejtësinë që të mbajë përgjegjës para ligjit cilido, pavarësisht statusit të tij”, shprehet Bardhi.

“Erion Veliaj nuk është mbi ligjin. Ai është mik e bashkëpunëtor i afërt i Edi Ramës, por ky i fundit nuk mund të keqpërdorë shtetin dhe Policinë e Shtetit për ti ardhur në ndihmë një personi që hetohet për korrupsion dhe pastrim parash. Edi Rama mund të zgjedhë të jetë avokat i Erion Veliajt, por këtë duhet ta bëjë privatisht, jo duke keqpërdorur institucionet e shtetit”, shton ai.

“Mosveprimi i Policisë së Shtetit, që sipas GJKKO dhe SPAK, ka vënë në rrezik jetën dhe shëndetin e gjyqtarëve, prokurorëve dhe stafit administrativ, në krye të detyrës, nuk mund të kalojë në heshtje” vijon më tej kreu i grupit parlamentar demokrat duke cituar reagimin e GJKKO, ndërsa kërkon që “Ministri i Brendshëm dhe Drejtori i Përgjithshëm i Policisë së Shtetit duhet të shkarkohen menjëherë nga detyra dhe të ndiqen penalisht”.

Në fund e mbyll me një apel për kryeministrin Edi Rama, duke u shprehur se “mosveprimi i Edi Ramës, e bën atë jo vetëm drejtpërdrejt përgjegjës për situatën, por është edhe një grusht shteti i pushtetit ekzekutiv ndaj pushtetit gjyqësor, duke zbatuar parimin mafioz se nëse gjykata e prokuroria dënon e heton pa leje, atëherë do jenë të vetëm e pa mbrojtjen e shtetit”.

“Kjo nuk do të ishte thjesht e paprecedentë, por KRIMINALE”, përfundon Bardhi.

Lexo edhe:

Antimitingu/ GJKKO: Policia asnjë masë sigurie gjatë gjyqit ndaj Veliajt, shkeli ligjin