Dy gjëra të reja në KPP nga data 1 korrik 2025: Së pari, Komisioni i Prokurimit Publik mban mbledhje pa kryetar, sepse Jonaid Myzyri u hoq nga SPAK; së dyti, anëtarët marrin vendim të mos tërhiqen përballë tekave të Anuela Ristanit që vazhdon me tenderin 465 milionë lekë për moblijet e zyrës.
Kjo e dyta, është një gjë e pazakontë për këtë institucion të përkulur para Bashkisë Tiranë. Ndërkohë ndihet në ajër një hetim i SPAK edhe për kryetaren e komanduar në vend të Erion Veliajt, për të cilën nuk mungojnë denoncimet.
Në mbledhjen e datës 1 korrik 2025, KPP mori në shqyrtim zbatimin e vendimit të Komisionit të Prokurimit Publik të dy javëve me parë për procedurën e prokurimit “E hapur, mbi kufirin e lartë monetar”, me objekt: Loti 2: “Blerje pajisje dhe orendi për nevoja të institucioneve të Bashkisë Tiranë”. Vendimi i shkurtër kishte në thelb: Të mos hiqet pezullimi për Bashkinë Tiranë mbi këtë tender.
Tenderi ishte parashikuar të mbahej më datë 23 qershor 2025, por ka mbetur i bllokuar, pas denoncimit të një biznesi për “kriteret diskriminuese” dhe “të ekzagjeruara” që ka vendosura Anuela për mobiljet e zyrës së saj.
Testimi 10 mijë euro për poltronin rrotullues
Një nga kushtet e vendosura ishte testimi i mobiljeve, i cili nuk u realizoka në Shqipëri, por jashtë vendit! Referuar faqes zyrtare të Drejtorisë së Përgjithshme të Standardizimit nuk rezulton që në Shqipëri të ketë një subjekt të akredituar për Testimin e Mobilerive apo aksesorëve të tyre.
Bashkia ka anashkaluar faktin se përpara se të arrish të finalizosh një testim zyrtar si fillim duhet të prodhosh produktin, që të prodhosh produktin sipas specifikimeve të kërkuara, cili do kohën e vet, të paktën disa javë dhe muaj. Pasi të jetë prodhuar produkti final vijohet me hapin tjetër të nënshkrimit të një marrëveshje me Laboratorin e Certifikuar për Testimin e Mobilerive, që e ka faturën mbi 10.000 Euro. Më tej vijohet me dërgimin e mostrave me furgon jashtë vendit, pasi nuk rezulton të ketë laborator të akredituar në Republikën e Shqipërisë për testim mobilerish. Pra, të bësh një testim jashtë vendit, përveç se duhet një thes me lekë, nevojiten minimalisht 3-4 muaj kohë.
“Kërkesa e bashkisë nuk i shërben qëllimit për arsye se edhe ata operator ekonomik që mund t’i kenë raportet e testimi për tavolina apo dollapë, sërish nuk i kanë në mënyrë koncize sipas përmasave dhe specifikave teknike që i duhen kësaj procedure. Nëse ata i kanë pasur (specifikimet) atëherë i bie që këta kishin informacion paraprak për specifikimet teknike dhe këto të fundit i’u janë dhënë përpara se te publikohej procedura e prokurimit, ç’ka do të përbënte shkelje të barazisë së tenderave në kuptim të Kodit Penal të Republikës së Shqipërisë”, shkruhet në denoncimin e kompanisë Klama shpk të dërguar në KPP.
Teka e Anuelës, testimi nuk hiqet nga kriteret
Në vendimin e marrë nga KPP hidhet poshtë ky kriter duke e quajtur “të ekzagjërurar dhe të paargumentuar”.
Në datën 16 qershor 2025, Komisioni i Prokurimit Publik mori vendimin “Të pranojë pjesërisht ankesën e paraqitur nga operatori ekonomik “Klame” SHPK dhe u urdhërua Bashkia Tiranë të ndryshonte dokumentet e tenderit.
Por ç’ndodhi! Bashkia bëri një marifet që e bën gjithnjë dhe po të ishte Myzyri në drejtim, KPP do t’i jepte dritë jeshile procedurës së prokurimit.
Më datë 26 mars 2025, Bashkia Tiranë njofton se ka zbatuar vendimin. Komisioni i Prokurimit Publik pasi e verifikoi sistemin e prokurimeve elektronike, konstatoi se Bashkia ka hartuar dhe publikuar shtojcën, e cila nuk është në përputhje me vendimin e datës 16 qershor 2025 të KPP.
Shpenzime për luks nga e besuara e Ramës
Anuela Ristani po heq mobiljet e Erion Veliajt nga zyrat dhe bën tender për mobilimin e selisë së bashkisë Tiranë. Poltron rrotullues, raft librash, tavolinë ovale si e Shtëpisë së Bardhë, kasafortë sekrete, komplete kolltuqesh, kredencë, garderobë, pasqyra për tualet dhe një listë e gjatë mobiliesh do t’ia ndryshojnë pamjen nga brenda zyrave.
Komisioni i tenderit i autorizuar nga kryetarja e komanduar e Bashkisë Tiranë, Anuela Ristani, e ka ndarë prokurimin në dy lote: Loti 1: “Pajisje për zyra” dhe Loti 2: “Blerje pajisje dhe orendi për nevoja të institucioneve të Bashkisë Tiranë”. Vlera e pritshme e kontratës është 46,482,958 lekë pa TVSH, ose 473,784.09 Euro pa TVSH, e ndarë në lote: Loti 1: “Pajisje per zyra”, me fond limit 15,408,601 lekë pa tvsh; Loti i dytë – “Blerje pajisje dhe orendi për nevoja të institucioneve të Bashkisë Tiranë” me fond 31,074,357 lekë pa tvsh.
Një preventiv i larmishëm prej 58 artikujsh është vendosur si detyrë speciale para bizneseve prodhuese të mobilerive dhe tregtarëve. Kryetarja kërkon “Poltron rrotullues”. Kjo pajisje është në modë për drejtuesit.
Ky që ka porositur kryebashkiakja është me tapiceri prej lëkure ekologjike, me shpinore të lartë. Me një mekanizëm që lejon fiksimin e pozicioneve të ndryshme të përshtatshme në ulje. Shpinorja duhet të jetë e përshtatshme në pozicionet vertikalisht si dhe para e prapa. Duhet të ketë krahë anësore. Të ketë përshtatëse piston me gaz për nivelimin e lartësisë. Thellësia e ulëses, e përshtatshme për përdorues të rritur. Bazamenti duhet të jetë metalik ose plastik me 5 degëzime në formë ylli dhe me rrota sferike në ekstremet e tyre. Të plotësojë kërkesat e standardit “SH EN 1335-1:2021, SSH EN 1335-2:2018”.
Etazher dhe kredencë e ulët drejtuesi. Hapja e kanateve duhet të jetë “shty dhe tërhiq”, pa doreza dhe aksesorët e përdorur të jenë cilësorë mundësisht prej metali të kromuar. Duhet garderobë për veshje/zhveshje; Kolltuqe komplet (3+2+1) me skelet druri, stil modern dhe tapiceri me lëkurë ekologjike. Mbushje me sfungjer cilësor. Modeli, seti, ngjyra, etj, do të përcaktohet nga kryetarja në momentin e lidhjes së kontratës;
Shpërndarës ushqimi me rrota. Ushqimi i kryetares duhet dërguar në zyrë ose në verandë, se drejtuesja nuk mund të shkojë në mensë. Duke parë sendet e porositura, duket që kryetarja nuk pëlqen asgjë nga mobiljet e Veliajt. Madje po ndërron edhe pasqyrat e tualetit. Xhami i pasqyrës të jetë i cilësisë së lartë, porosit kryetarja. Ngjyrat të jenë të ndryshme dhe përcaktimi i saktë i tyre do të bëhet në kushtet e lidhjes së kontratës. Montimi sipas kërkesave të Autoritetit. “Të paketohen që të mos dëmtohen gjatë transportit, të jenë me korniza druri”, shkruhet tek specifikat. Është porositur edhe poltron pritje dyvendësh (kolltuk dyvendësh); Raft për bibliotekën; Raft lodrash; Mobilje për kuzhinë, lavamani i inkastruar, frigoriferi, etj.
Ndërkaq, kryetarja ka edhe sekrete. Sidomos tani, që “spiunët” e SPAK-ut të tipit “Nesti Angoni” janë shtuar, duhet një kasafortë e sigurt. Kasaforta duhet të ketë strukturë me trashësi jo më pak se 1.5 mm. Të ketë dy ndarje horizontale nga brenda, ku të krijohen tre hapësira. Dera të jetë e pajisur me dorezë dhe bravë automatike sekrete.
Kujtojmë se Anuela Ristani, e komanduar nga Rama në krye të Bashkisë, është thirrur në SPAK për shpërdorim detyre pas denoncimeve në media dhe deklaratave të opozitës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post