Apeli i GJKKO-së pranoi këtë të martë pjesërisht ankimin e deputetes Monika Kryemadhi, duke liruar nga sekuestro vilën e së ëmës.
Ndërkohë, vijon të mbetet nën sekuestro vila e Kryemadhit, për të cilën ajo paralajmëroi se do të bëjë ankim në shkallët e tjera të drejtësisë.
Afro një muaj më parë, GJKKO, me kërkesë të SPAK, vendosi sekuestrimin e dy vilave te rezidenca “Kodra e Diellit” në Tiranë, në pronësi të Monika Kryemadhit dhe të ëmës së saj, me sipërfaqe 448.9 m2 secila. Sekuestro erdhi në kuadër të hetimeve ndaj Monika Kryemadhit dhe ish-bashkëshortit të saj Ilir Meta, të cilët akuzohen për veprat penale të korrupsionit pasiv, pastrim parash dhe fshehje pasurie.
Të dy i kanë mohuar akuzat duke i quajtur politike. Të njëjtin qëndrim, Kryemadhi e përsëriti edhe këtë të martë jashtë ambienteve të gjykatës, në përfundim të seancës.
“Është e gjitha një hakmarrje sa i përket inceneratorit të Tiranës. Është një betejë ligjore që do durim dhe konsitencë nga ana jonë. Si banesa ime dhe e mamasë time janë të përfituar në mënyrë të ligjshme, por ka edhe një avantazh se unë futem pa radhë në gjykatën e Strasburgut. Unë e kam marrë me shkëmbim apartamentin tim. Bëhet fjalë për një shtëpi në bllok që janë marrë të dyja me kredi”, tha deputetja.
Ilir Meta është lënë nën masën e sigurisë arrest në burg nga të dyja shkallët e gjyqësorit, ndërsa Kryemadhi në detyrim paraqitje. E njëjta masë është caktuar për dy të akuzuarit e tjerë të procedimit penal, Pirro Xhixho dhe Ema Çoku.
Discussion about this post