Gjykatës e Posaçme e Apelit për Korrupsionin dhe Krimin e Organizuar ka lënë në fuqi vendimin e Gjykatës së Posaçme të shkallës së parë për sekuestrimin e pasurive të ish-ministrit Arben Ahmetaj dhe ish-gruas së tij, Albina Mançka, për të cilat Gjykata Kushtetuese gjeti shkelje procedurale dhe cenimin e të drejtës së pronës.
Gjyqtari Dhimitër Lara la sot në fuqi sekuestrot për një apartament në zonën e Shallvareve, një depozitë dhe një llogari bankare të zotëruara nga Ahmetaj.
Trupi gjykues monokratik i përbërë nga gjyqtari Dhimitër Lara, pas shqyrtimit të çështjes vendosi miratimin e vendimit/urdhrit të Gjykatës së Posaçme të Shkallës së Parë për Korrupsionin dhe Krimin e Organizuar, për pasurinë:
“Apartament n.*, sip.167m2, zk *, rruga ‘*’, ap.*, *, regjistruar në pronësi të z.A.A.; Shuma 8.620,68 euro në llogarinë me n.*, në * Bank, në emër të personit nën hetim z.A.A.; Shuma 115.692,84 euro në depozitën n.*, në ** Bank, me balancë 115.692,84 euro, në emër të personit nën hetim z.A.A”, njoftoi GJKKO.
Në prill të këtij viti Gjykata Kushtetuese pranoi pjesërisht ankimin e ish-zv.kryeministrit Arben Ahmetaj, duke shfuqizuar një pjesë të vendimeve për sekuestrimin e pasurive të tij dhe duke rikthyer çështjen për shqyrtim në Gjykatën e Posaçme të Apelit për Korrupsionin dhe Krimin e Organizuar.
Ahmetaj është shpallur në kërkim nga SPAK që nga viti 2023, pasi akuzohet për mosdeklarim pasurie, korrupsion dhe pastrim parash.
Discussion about this post