Gjykata e Apelit të Shkodrës i ka dhënë të drejtë Partisë Demokratike Dega Shkodër për akuzat ngritura lidhur me punësimet masive gjatë fushatës elektorale në Bashkinë e Vaut të Dejës.
Përfaqësuesi ligjor i PD-së, Marash Logu zbardhi në një prononcim për mediat vendimin e Gjykatës së Apelit.
Në vendim, Apeli detyron Prokurorinë të nisë menjëherë hetimet dhe të thërrasë personat e akuzuar përgjegjës dhe Kryetarin e Bashkisë së Vaut të Dejës si autor i punësimeve elektorale.
Logu tha gjithashtu se ka prova konkrete që implikojnë në mënyrë direkte administratën e Bashkisë së Vaut të Dejës në punësimet masive gjatë fushatës elektorale të 25 Prillit.
“Prej 2 vitesh Partia Demokratike e Vaut të Dejës ka depozituar dhjetra padi, shkeljet dhe abuzimet janë intisifikuar më shumë përpara zgjedhjeve të 25 Prillit, me bursa, leje ndërtimi, punësime fiktive, vetëm e vetëm në funksion të partisë që është në pushtet. Ne kemi pritur që prokuroria ti sjellë përpara përgjegjësisë penale këta persona. Sot ne ishim në Gjykatën e Apelit, ku prokuroria kërkon të mbyllë hetimet. Gjykata vendosi qartësisht që prokuroria të marrë në hetim dhe në pyetje kryetarin e Bashkisë në Vaun e Dejës”, u shpreh Logu.
Logu shtoi se këto janë vetëm faktet e para të asaj që demokratët e konsiderojnë ‘masakra zgjedhore e 25 Prillit’.
