Apeli lë Berishën në dritare, avokati: U shkel Kushtetuta

Sali Berisha do të vijojë ti ligjërojë mesazhet e tij politike nga dritarja e banesës, për një kohë ende të papërcaktuar.

Apeli i GJKKO-së rrëzoi këtë të hënë kërkesën e ish- për ta lejuar që të marrë pjesën në seancat plenare në Kuvend.

Berisha ndodhet prej 30 Dhjetorit nën masën e sigurisë “arrest shtëpie” dhe nuk prej 3 muajsh mungon në seancat parlamentare.

Pas seancës, avokati i tij Genc Gjokutaj tha se vendimi i Apelit është në shkelje të Kushtetutës dhe është urdhëruar nga kundërshtari politik i ish-kryeministrit, kryeqeveritari Edi Rama.

“Ky vendim i sotëm vendosi rrëzimin e kërkesës sonë. Sot u vërtetua shkelmimi i Kushtetutës edhe nga Apeli. Këta janë sy që nuk shikojnë dhe veshë që nuk dëgjojnë, me regji. Duam që të lirohet Berisha, sepse nuk ka akuzë, dhe nuk ka prova. Këta kanë vënë trupat e tyre për ta mbajtur në këmbë sistemin. Kjo gjykatë me vendimin e saj e largoi veten nga ligji dhe Kushtetuta. Nuk pranon SPAK as ekspertizat, asgjë. Kjo është çartje dhe lajthitje”, tha avokati për gazetarët.

Berisha akuzohet për korrupsion pasiv kryer në bashkëpunim në çështjen penale për privatizimin e ish-kompleksit sportiv “Partizani”. Për të njëjtën dosje janë ngritur akuza penale dhe ndaj dhëndrit të Berishës Jamarbër Malltezi si dhe ndërtuesit Fatmir Bekteshi.

Vetë Berisha i ka konsideruar akuzat ndaj tij dhe dhëndrit, të paqena dhe të dirigjuara nga Edi Rama.

Ndërkohë, beteja për liri e Berishës vijon nëpër gjykata.

Gjykatën e Lartë regjistroi javën e kaluar rekursin e bërë nga ish-kryeministri kundër masës “arrest në shtëpi”, caktuar nga Gjykata e Posaçme dhe konfirmuar nga Apeli.