Gjykata e Posaçme e Apelit konfirmoi masën e sigurisë “arrest me burg” për Plaurent Dervishajn, të akuzuar si pjesëmarrës në dy ngjarje të vitit 2005, ekzekutimit të ish-pjesëtarit të Bandës së Durrësit, Klodian Saliu në segmentin Durrës-Tiranë dhe atë të biznesmenit Vajdin Lamaj në kryeqytet.
Dervishaj kishte apeluar vendimin e Gjykatës së Posaçme të Shkallës së Parë, por kërkesa e tij u rrëzua.
Dervishaj u ekstradua nga Dubai gjatë muajit gusht, edhe pse vetë i akuzuari pretendon se nuk bëhet fjalë për ekstradim dhe as deportim, por për rrëmbim personi.
Avokati i tij i tha gjykatës se më 6 gusht forcat Policore të Dubait kanë mësyrë në banesën e Dervishajt, ku i kanë thënë se jeta e tij ishte në rrezik. Ata e kanë përcjellë në një stacion policor ku është mbajtur i izoluar dhe nuk i është lejuar kontakt me avokatin. Gati 10 ditë më pas e kanë hipur në bordin e një avioni, që ka udhëtuar drejt Rinasit, ku është prangosur për llogari të urdhër-kërkimeve në emër të tij.
Procesi penal ndaj gjashtë të akuzuarve për dy vrasjet e vitit 2005, mes të cilëve Derivshaj, Lulëzim Berisha e Emiljano Shullazi në Gjykatën e Posaçme ndodhet në fazën e pyetjes së dëshmitarëve të fundit të mbrojtjes.
Plaurent Dervishaj dhe Julian Meçe, po ashtu i transferuar nga Dubai, akuzohen edhe për përfshirje në atentatin ndaj prokurorit Arjan Ndoj, nëntorin e vitit 2019, ku u plagos prokurori dhe Aleksandër Laho dhe mbeti i vrarë shoferi i mjetit, Andi Maloku.
Discussion about this post