Pas vendimit të Gjykatës së Apelit për vulën e PD, kryetari i Partisë Demokratike Sali Berisha e ka quajtur ditën e sotme, si një një nga ditët më të veçanta në histori, në përpjekjen e shqiptarëve për demokraci. “Fakti që ky flamur sot dhe përjetë na përket ne është një mrekulli e lirisë për të gjithë shqiptarë”’, u shpreh Berisha në tubimin që zhvillohet në mbështetje të tij poshtë banesës së kryedemokratit.
Berisha i ka bërë thirrje çdo demokrati që ende nuk është bashkuar me selinë blu, se e kanë derën e hapur. “Dera është e hapur për kontributin dhe mendimin ndryshe të garantuar për çdo demokrat! Sot nuk ka fituar Berisha, por ka fituar demokracia”, u shpreh.
Lideri i opozitës ka vlerësuar “guximin dhe integriteti” e tre gjyqtareve të Gjykatës së Apelit, të cilat vendosën që vula dhe logo të rikthehen në Partinë Demokratike të Rithemelimit. “Sot gjyqtaret guximtare kryen aktin më të madh të trimërisë; ato guxuan dhe thanë të vërtetë”’, u shpreh Berisha.
Kryetari i Partisë Demokratike ka theksuar se mesazhi që duhet dhënë çdo ditë është bashkimi i demokratëve. “Mesazhi më i rëndësishëm që duhet dhënë dhe që duhet ta japim çdo ditë është vetëm një: bashkim, bashkim, bashkim”, u shpreh Berisha.
Kryedemokrati i ka bërë thirrje të gjithë faktorëve politikë, “partive të mëdha dhe të vogla, qytetarëve pa parti, që të bashkohen për të shpëtuar Shqipërinë”.
“Ju ftoj të përbashkohemi rreth këtij flamuri dhe në një aleancë historike shqiptare, bashkë të shpëtojmë Shqipërinë”, theksoi Berisha.
Discussion about this post