Apeli i Posaçëm Antikorrupsion ka rrëzuar ankimin e ish-futbollistit të Kombëtares, Igli Tare, duke lënë në fuqi masën e sekuestros preventive për vilën e dytë në Palasë.
Sipas Prokurorisë së Posaçme, vila dyshohet se është pronë e fshehur e ish-zv.kryeministres Belinda Balluku.
Ajo dyshohet se është përfituar në këmbim të favorizimit të shoqërisë “Aleko Impex General Construction”, e cila u shpall fituese, së bashku me një kompani tjetër, në tenderin me vlerë rreth 30 milionë euro, me TVSH, për lotin 7 të Unazës së Madhe të Tiranës.
Prona në Palasë ka një sipërfaqe trualli prej 478 metrash katrorë, ndërsa vila është e përbërë nga dy kate me një sipërfaqe totale prej 271.2 metrash katrorë. Në pronë ndodhen edhe dy garazhe, me sipërfaqe 20 dhe 40 metra katrorë.
Më herët, SPAK kishte vendosur sekuestro edhe mbi një tjetër vilë në jug të vendit, në kompleksin “White Rock” në Dhërmi. Edhe kjo pronë rezulton e regjistruar në emër të Igli Tares dhe vijon të jetë e sekuestruar.
Discussion about this post