Pas ngjarjes tragjike në Spitallë, banorët e Arapajt në Durrës kanë lajmëruar një protestë sot në orën 10:00 për të kundërshtuar pasigurinë në lagjen e tyre. Shqetësimi kryesor lidhet me dy të rinj, motër e vëlla, të cilët akuzohen për dhunë të vazhdueshme dhe konflikte me fqinjët.
Banorët pretendojnë se 20-vjeçarja, e cila studion për police, ka plagosur me thikë një komshie pas një debati për parkimin rreth dy javë më parë. Përveç dhunës fizike, denoncuesit thonë se të rinjtë lëvizin me shpejtësi të rrezikshme dhe u përplasin qëllimisht makinat e parkuara.
Edhe pse rreth 20 familje kanë bërë denoncime të përsëritura, ata shprehen se policia nuk ka marrë masa dhe situata po përkeqësohet. Pas pritjeve të gjata në komisariat, komuniteti ka vendosur të kërkojë vëmendjen e mediave përmes tubimit të sotëm.
Njoftimi i banorëve:
“Në orën 10:00 banorët e Arapajt do të protestojnë në lagjen e tyre për një situatë të ngjashme me “Bishën”!
Një 22 vjeçar dhe motra e tij 20 vjeçe (kjo e fundit vazhdon studimet për efektive policie, por dy javë më parë ka plagosur me thikë komshien dhe e ka rrahur brutalisht për parkim- keni njoftim policie me datë 26 prill), janë persona problematik në zonë, duke ecur me shpejtësi në rrugica të banueshme dhe duke përplasur makinat e fqinjëve qëllimisht.
Pasi 20 familje i kanë denoncuar me dhjetëra herë në polici, por të rinjtë vazhdojnë dhe agravojnë sjelljen.
Të ndjerë nën rrezik, banorët kanë qëndruar në rajon për mbi 6 orë gjatë ditës së sotme për këtë çështje dhe janë larguar pa asnjë përgjigje.
Për këtë arsye do të protestojnë në lagjen e tyre në Arapaj dhe kërkojnë praninë e të gjithë mediave.”, njoftojnë banorët.
Discussion about this post