‘Nuk kanë guxim të prekin Ballukun’/ Arben Ahmetaj: Do ta sjellin imunitetin kur t’i duhet Ramës për te Marta Kos

Ish-zv/kryeministri Arben Ahmetaj ka bërë deklarata të forta lidhur me çështjen e imunitetit të deputetes Belinda Balluku, duke pretenduar se vendimmarrja për të nuk lidhet më vetëm me aspektin juridik, por edhe me interesa politike.

I ftuar në ‘Çim Peka LIVE’ në SYRI TV, Ahmetaj tha se, sipas tij, mazhoranca nuk ka guxim të votojë heqjen e imunitetit të Ballukut pa një vendimmarrje politike nga kryeministri Edi Rama.

‘Këta nuk kanë guxim të provokojnë kreun e organizatës që të votojë aty bashkë me të gjithë grupin parlamentar, heqjen e imunitetit të plaçkitëses’, deklaroi Ahmetaj.

Sipas ish-zv/kryeministrit, kërkesa për heqjen e imunitetit do të përdoret në një moment që i leverdis politikisht Ramës.

‘Këta do ta sjellin kur kreu i organizatës t’i thotë: tani më duhet ajo votë, sepse dua ta shes në komision te Marta Kos. Dua të blej kohë. Dua t’i them protestës: ‘Ja, më kërkuat këtë, e bëra’’, tha Ahmetaj.