Një ngjarje tronditëse ndodhi pasditen e sotme në burgun e Peqinit, ku është ekzekutuar brenda qelisë së tij, i dënuari me burgim të përjetshëm Arben Lleshi. Autor i dyshuar i krimit është një tjetër i dënuar po me burgim të përjetshëm, Sokol Mjacaj. Ndërkohë i plagosur ka mbetur Indrit Shaqja, i cili ndodhej në një qeli me viktimën.
Krimi ka ndodhur në seksionin 2 të posaçëm të burgut të sigurisë së lartë, ndërsa autori ka përdorur një pistoletë me mulli, që ende nuk dihet se si ka hyrë në ambientet e burgut dhe më pas është marrë nga Mjacaj.
Dyshimet janë se pistoleta është futur me një dron, por nuk përjashtohet mundësia që ajo të jetë futur në mjediset e burgut nga punonjës dhe më pas është fshehur.
Pak orë para ngjarjes në media u publikua një urdhër i ministrit të Drejtësisë, Ulsi Manja, sipas të cilit Sokol Mjacaj do të izolohej në 41 biss, për ngjarje të tjera që kishin ndodhur në këtë burg. Manja nuk dha detaje për çfarë ngjarjesh e kishte fjalën, por duket se ky vendim ka mbërritur edhe në Peqin, dhe ndoshta autori i dyshuar mund të ketë përshpejtuar planin për vrasjen e Lleshit.
Nga raportimet mësohet se mes viktimës dhe autorit nuk ka pasur përplasje, të paktën në mjediset e burgut, ndërsa dyshimet janë se vrasja është kryer si një porosi për persona që ndodhen jashtë burgut.
Eksperti i sigurisë, Ervin Karamuço, tha se Mjacaj është përdorur edhe më parë nga grupet kriminale lidhur me ngjarje në burg, pra nuk përjashtoi pistën që vrasja e sotme të jetë pikërisht një porosi nga jashtë për të ekzekutuar të dënuarin me burgim të përjetshëm Arben Lleshi.
Ky i fundit është ekzekutuar me tre plumba në momentin që ka qenë në qelinë e tij, ndërsa Indrit Shaqja ka mbetur i plagosur në këmbë, pasi është ndodhur në vendin e gabuar, në kohën e gabuar.
“Arben Lleshi dil”, i është drejtuar Mjacaj, viktimës, dhe në momentin që iu shfaq ai ka qëlluar me armën e zjarrit.
Më pas autori ka bërë një tentativë për të rezistuar duke krijuar skena pengmarrjeje, ndërsa ka paralajmëruar se do të qëllojë nëse dikush i afrohet. E gjithë situata e tensionuar ka zgjatur për rreth 1 orë, derisa në negociata me Mjacajn ka hyrë drejtori i burgjeve, që sipas raportimeve, duket se e ka bindur autorin e dyshuar që të dorëzohet.
“Drejtori ka hyrë në negociata pa antiplumb, ka shkuar atje ku Mjacaj ishte vetëizoluar dhe paralajmëronte se do të qëllonte nëse dikush tjetër afrohej”, u shpreh Karamuço në një prej mediave televizive, duke dhënë detaje mbi ngjarjen.
Nuk dihet se çfarë ka folur drejtori i burgut me autorin e dyshuar, por pas disa minutash ai është dorëzuar, duke lënë armën e zjarrit.
E gjithë negociata është zhvilluar ndërsa në mjediset e burgut ndodheshin edhe forcat RENEA, bashkë me negociatorin e tyre, por edhe trupa të Operacionales dhe FNSH.
Me qetësimin e situatës, Mjacaj është transferuar drejt Drejtorisë së Policisë së Elbasanit, atje ku po merret në pyetje nga prokurorët e Elbasanit, ndërkohë që një dëshmi pritet të japë edhe i plagosuri, Indrit Shaqja që ndodhet në spital, për shkak se një nga plumbat e ka goditur në këmbë.
Discussion about this post