Arben Vitia ka dhënë dorëheqjen nga pozita e ministrit të Shëndetësisë së Kosovës. Lajmin e ka bërë të ditur vetë Vitia në një konferencë për mediat teksa falënderoi kryeministrin Albin Kurti dhe qytetarët kosovarë për besimin.
“Mua mu dha besimi nga kryeministri Kurti dhe pata privilegjin që të shërbej me të gjithë fuqinë që disponoj popullit të cilit i përkas në një kohë të vështirë, të dhimbshme dhe me sakrifica. Ju jam mirënjohës përjetë për besimin e dhënë dhe mbështetjen e dhënë. Të nderuar qytetarë. Besoj fuqishëm që së bashku do ta kalojmë këtë test nëse të gjithë e konsiderojmë këtë si sukses tonë”.
Më tej, Vitia tregoi arsyet e dorëheqjes, duke thënë se tani do të përqendrohet në garën për kryebashkiak të Prishtinës.
“Më lejoni që të ju njoftojë për një vendim që e kam marrë në bashkërendime me kryeministrin Kurti dhe me LVV-në. Unë sot po e përmbyll angazhimin tim në këtë detyrë me të cilën më ka ngarkuar kryeministri Kurti që do t’i jem mirënjohës jo vetëm për besimin por edhe për mbështetjen. Unë ja transferoj përgjegjësinë stafit të ministrisë, zëvendësministres Dafina Gexha me bindjen e plotë se puna e mirë do të vazhdojë. Nga tani e tutje do të jem pjesë e një ekipi tjetër që ka në fokus kryeqytetin tonë. Kjo sepse ne jemi në një moment kritik, ku nga ne pritet që të merren vendime të guximshme për transformimin e qyteteve tona”, ka thënë Vitia.
Vitia është kandidat për kryetar i Lëvizjes Vetëvendosje për Prishtinën.
Dafina Bunjaku emërohet ministrja e re e Shëndetësisë në Kosovë
Dafina Gexha Bunjaku është emëruar në postin e ministres së Shëndetësisë në Kosovë, pasi ish-ministri Arben Vitia dha dorëheqjen.
Bunjaku aktualisht është zëvendësministre e Shëndetësisë, ndërsa më herët ka punuar në Institutin Kombëtar të Shëndetësisë Publike në Departamentin e Epidemiologjisë, ndërsa ka qenë pjesë e ekipit të IKShPK për fazën përgatitore dhe menaxhuese për COVID-19.
Ajo gjithashtu është koordinatore për Kosovën në ECDC (Qendra Evropiane për Parandalim dhe Kontroll të Sëmundjeve Ngjitëse), për raportim dhe bashkëpunim në disa fusha. Ka punuar në Programin e Mjekësisë Familjare të zhvilluar dhe përkrahur nga Organizata Botërore e Shëndetësisë dhe Kolegji Mbretëror i Mjekëve të Përgjithshëm, Mbretëri e Bashkuar.
Më herët, në një konferencë për mediat, ish-ministri Vitia tha se po e jep dorëheqjen pasi do të fokusohet në garën për kryebashkiak të Prishtinës.
