Dinamo e Zagrebit fitoi 3-0 kundër Sibenik për raundin e 21-të në elitën e futbollit kroat. Vendimtar me gol dhe asist për të besuarit e Fabio Cannavaros ishte sulmuesi i kombëtates shqiptare, Arbër Hoxha.
Vendasit kaluan në avantazh në minutën e 38-të me golin e Mmaee. Në minutën e 59-të trajneri Cannavaro vendosi të hidhte në fushë Arbër Hoxhën në vend të Marco Pjacës.
Vetëm 15 minuta në fushë dhe Hoxha do tregonte potencialin e tij, duke marrë një top pas shpine, kontrolluar bukur, dribluar rivalët dhe me gjuajtjen e bukur gjeti golin e dytë të ndeshjes dhe të tretin këtë sezon. Gjashtë muaj pritje për djaloshin kuqezi që të shënonte sërish në kampionat për Dinamo Zagreb.
“Magjia” e Hoxhës nuk do ndalej këtu, pasi në minutën e 78-të ai asistoi për Baturinën, me Dinamo Zagreb që shënoi golin e tretë. Në elitën e futbollit kroat kryeson Rijeka me 39 pikë, ndjekur nga Hajduk Split me 37 pikë dhe Dinamo Zagreb me 35 pikë.
Discussion about this post