Kreu i Departamentit të Antiterrorit, Gledis Nano do të emërohet në krye të policisë së Shtetit, pas dorëheqjes së Ardi Veliut.
Mësohet se, Nano është propozuar nga vetë Ministri i Brendshëm Bledi Çuçi dhe kur kandidatura ka shkuar në tavolinën e kryeministrit Edi Rama, ai e ka miratuar.
Ish- kreu i Policisë së Shtetit, Ardi Veliu vendosi që të largohej nga detyra një ditë më parë me argumentin se do të tërhiqej për t’ju dedikuar familjes së tij. Veliu është kritikuar vazhdimisht dhe është përfshirë në skandale, por duket se vetëm dje ai vendosi të reflektonte duke dhënë dorëheqjen.
Ish Drejtori i Policisë së Tiranës, Ardi Veliu u emërua drejtor i Policisë së Shtetit me firmën e kryeministrit Rama, i propozuar nga ministri i Brendshëm Fatmir Xhafaj. Veliu zëvendësoi në këtë detyrë Haki Çakon, i cili u lirua më 8 janar 2018.
Nga ana tjetër, Nano ka mbajtur deri më tani postin e Drejtorit të Antiterrorit. Në muajin gusht, në emër të qeverisë Amerikane, ishte ambasadorja Yuri Kim që i Nanos një certifikatë vlerësimi, pasi ka qenë në krye të disa operacioneve të suksesshme antiterrori.
Nano ka qëndruar në krye të Antiterrorit për 5 vite ku ka drejtuar disa operacione delikate. Një i tillë ishte dhe ai i dëbimit të diplomatëve iranianë apo rusë nga vendi jonë. Ai ka kaluar dhe procesin e Vetingut duke u konfirmuar në detyrë dhe duke mos iu gjetur pasaktësi.
