Arlind Qori, kryetari i Lëvizjes BASHKË, ka shpallur zyrtarisht kandidaturën për postin e kryetarit të Bashkisë së Tiranës në zgjedhjet që do të mbahen më 9 nëntor, pas shkarkimit të ish-kryebashkiakut Erion Veliaj.
Qori do të përballet në këtë garë zgjedhore me kandidaten e Partisë Socialiste, Ogerta Manastirliu, dhe kandidatin e Partisë Demokratike, ende të pacaktuar.
Në njoftimin e bërë publik nga Lëvizja BASHKË, Qori paraqitet si “alternativa e vërtetë për Tiranën”, një zë kritik ndaj keqqeverisjes dhe një figurë me histori të gjatë angazhimi në çështje qytetare dhe sociale. Si pedagog dhe aktivist, ai ka qenë i pranishëm në debatet publike mbi çështje kyçe si strehimi, transporti publik, ndotja e ajrit, hapësirat e gjelbra dhe lufta kundër korrupsionit në administratën lokale.
“Zgjedhjet në Tiranë nuk janë vetëm një mundësi për ta transformuar qytetin sipas nevojave të qytetarëve, por edhe një betejë idesh që do të rezonojnë në të gjithë Shqipërinë,” thuhet në deklaratën e plotë të Lëvizjes.
Kjo garë pritet të jetë një nga më të rëndësishmet dhe të ndjekurat në vend, me rëndësi të veçantë për të ardhmen politike të kryeqytetit dhe më gjerë.
Postimi i plotë:
ARLIND QORI, ALTERNATIVA E VËRTETË PËR TIRANËN Propozimi i Lëvizjes BASHKË për mbarë qytetarët e Tiranës në zgjedhjet e 9 nëntorit është emri i kryetarit të saj, Arlind Qori, zëri dhe njeriu, arsimtari dhe aktivisti që për mbi një dekadë ka folur çdo ditë mbi qytetin dhe njerëzit e tij, parqet dhe shkollat, ujin dhe ajrin, të drejtën e strehimit dhe transportin publik, korrupsionin dhe keqqeverisjen etj.
Për ne, zgjedhjet në Tiranë nuk janë thjesht një mundësi për ta shndërruar qytetin sipas nevojave dhe aspiratave të qytetarëve, por edhe një betejë idesh dhe shembujsh që do të rezonojnë në të gjithë Shqipërinë. Prandaj Arlind Qori, me gjithë eksperiencën, seriozitetin, idealizmin dhe qëndrueshmërinë e tij, është alternativa e vërtetë për qytetin e Tiranës. Me besim te qytetarët dhe përkushtimi i gjithkujt që do të na bashkohet në këtë fushatë, dalshim faqebardhë!
Discussion about this post