Ditën e djeshme Kombëtarja e vajzave u mposht 0-5 nga Norvegjia në sfidën e parë play-off të Euro 2025, ndeshje e zhvilluar në “Loro Boriçi”. Në prag të kësaj sfide presidenti Armand Duka është takuar me zyrtarët dhe homologët e tij norvegjezë pikërisht në qytetin e Shkodrës.
Në këtë takim, Duka thotë se janë shkëmbyer ide për avancimin e futbollit në Shqipëri dhe veçanërisht në atë të vajzave. Ndër të tjera, presidenti i FSHF-së thekson se me kalimin e viteve Federata Shqiptare dhe ajo e Norvegjisë kanë zhvilluar projekte të përbashkëta. Në këtë takim vlen të theksohet se krah Dukës ishin dhe kryetari i Bashkisë Shkodër, Benet Beci dhe presidenti i Vllaznisë Alban Xhaferi.
Në fund, Duka falenderoj presidenten e Federatës së Futbollit të Femrave në Norvegji, Lise Klaveness dhe Karl-Petter Løken, Sekretar i Përgjithshëm i Federatës Norvegjeze.
Postimi i Armand Dukës:
Ishte kënaqësi të takohesha me Lise Klaveness, Presidente e Fotballandslaget, dhe Karl-Petter Løken, Sekretar i Përgjithshëm i Federatës Norvegjeze, përpara ndeshjes vendimtare Shqipëri-Norvegji dje – një sfidë e rëndësishme në përpjekjet e ekipit tonë kombëtar për një vend në fazën play-off të UEFA Euro 2025.
Kemi shkëmbyer ide mbi avancimin e futbollit në Shqipëri, veçanërisht në futbollin e vajzave, ku mbështetja dhe fryma bashkëpunuese e Lise-s kanë qenë të paçmueshme. Me kalimin e viteve, Federata Shqiptare dhe ajo e Norvegjisë kanë zhvilluar projekte të përbashkëta dhe kanë përafruar strategjitë për të zhvilluar futbollin, duke hapur rrugën për një bashkëpunim edhe më të ngushtë në të ardhmen.
Gjatë qëndrimit tonë në Shkodër, ne patëm diskutime produktive edhe me kryetarin e bashkisë së qytetit, drejtuesit e klubeve lokale dhe vlerësuam arritjet e Klubit të Futbollit të Femrave Vllaznia. Edhe pse skuadra jonë u mund, ishte e qartë se futbolli shqiptar për vajza po bën hapa të shpejtë përpara.
Teksa shohim përpara, ne jemi të lumtur për të vazhduar bashkëpunimin tonë me Federatën Norvegjeze, jo vetëm në futbollin e vajzave, por edhe në zhvillimin e proceseve stërvitore, akademitë dhe projekte të tjera të përbashkëta.
Faleminderit, zonja Presidente, për vizitën dhe mbështetjen tuaj të patundur!
gijotina.com/
Discussion about this post