Armando Broja ka deklaruar se e ka idhull Kristiano Ronaldon dhe në të ardhmen mund të bëhen një dyshe sulmuese me futbollistin luzitan. Kjo është një nga hipotezat që po qarkullon në shtypin anglez së fundmi përsa i përket të ardhmes së bomberit kuqezi, i cili mendohet se mund të jetë tek synimet e Mançester Junajtid.
Që kur “djajtë e kuq” emëruan Erik Ten Hag në pankinën e tyre për sezonin e ardhshëm, ka nisur gara për të mësuar emrat e atyre që do të jenë pjesë e ekipit për edicionin e ri dhe e vetmja gjë që është arritur të mësohet është që klubi ka nisur negociata me “një sulmues të ri të Premier Ligës”.
Gazeta “Daily Express” ka bërë një analizë të situatës dhe sheh vetëm 5 opsione të mundshme që përmbushin këto kushte dhe ai që i afrohet më shumë është Armando Broja.
“Duke parë se Broja është vetëm 20 vjeç, duket sikur ai është emri në diskutim këtu. Shqiptari është përshtatur me futbollin profesionist në Premier Ligë si një rosak në ujë dhe është e lehtë ta kuptosh pse Junajtid mund të jetë i interesuar për të. Broja ka shënuar 6 gola në 30 ndeshje deri më sot në këtë sezon ku është në huazim te Sauthempton. Por ishte një javë ku ai bezdisi si Junajtid, ashtu edhe Totenhem, ajo që në të vërtetë tregoi cilësitë e tij. Nëse Çelsi do të ishte e gatshme të shesë Brojën, për më tepër te një rival, kjo mbetet për t’u parë”, shkruan gazeta britanike, e cila sheh si kandidatë të tjerë për Mançester Junajtid sulmuesit Riçarlison, Dominik Kalvert-Ljuin, Ivan Tonei dhe Edi Nketiah.
Discussion about this post