Kryeministri izraelit, Benjamin Netanyahu e hapi fjalimin e tij në Knesset në hebraisht duke falënderuar personalisht Presidentin e SHBA-së Donald Trump dhe duke shprehur entuziazëm për kthimin e pengjeve të fundit të gjallë.
Ai u drejtua presidentit amerikan me deklaratën që “do të gjesh vendin tënd në historinë e kombit tonë, ashtu siç je i gdhendur në historinë e botës.”
“Sa gjatë kemi pritur për këtë moment… Dhe dua t’ju falënderoj personalisht, në emër të të gjithë kombit.Faleminderit shumë, z. President“, tha Netanyahu.
Ai e përshkroi Donald Trumpin si mikun më të madh që shteti i Izraelit ka pasur dhe ka në Shtëpinë e Bardhë.
“Askush nuk ka bërë as edhe një pjesë të vogël të asaj që ka bërë Donald Trump”, tha Benjamin Netanyahu, duke theksuar se propozimi i tij për paqe hap derën për zgjerimin e paqes. “Z. President, ju jeni i përkushtuar ndaj kësaj paqeje. Unë jam i përkushtuar ndaj kësaj paqeje. Dhe së bashku, z. President, ne do ta arrijmë këtë paqe”, vazhdoi udhëheqësi izraelit.
Në fjalimin e tij, presidenti amerikan, Donald Trump nga foltorja e Knessetit, e konsideroi ditën e sotme si ditë feste, referuar armëpushimit dhe shkëmbimit të pengjeve Hamas –Izrael. Presidenti amerikan tha se sot nuk shënohet vetëm fundi i një lufte, por fundi i një epoke terrori dhe vdekjeje dhe fillimi i një epoke besimi dhe shprese.
“Pas kaq shumë vitesh lufte të pafundme dhe rreziku të pafund, sot qielli është i qetë, armët janë të heshtura dhe sirenat nuk dëgjohen. Nuk është vetëm fundi i një lufte, është gjithashtu fundi i një epoke terrori dhe vdekjeje dhe fillimi i një epoke besimi dhe shprese. Shpreh mirënjohjen time për një mik, Kryeministrin Netanyahu“, tha gjithashtu presidenti amerikan, duke e përshkruar kryeministrin izraelit si “të vështirë” për të negociuar. “Por kjo është ajo që e bën atë të madh,” vazhdoi Donald Trump.
“Ne kemi njerëz të talentuar që punojnë me ne dhe ne jemi njerëz që e duam vendin tuaj dhe rajonin, Lindjen e Mesme”, tha presidenti amerikan, duke theksuar se gjithçka po fillon të ndryshojë për mirë që nga ky moment e tutje.
“Pengjet janë kthyer, është shumë mirë ta thuash këtë”, tha gjithashtu Donald Trump, duke thënë se ai tani i ka dhënë fund tetë luftërave, përfshirë atë në Lindjen e Mesme. “Dua t’i ndal luftërat. Paqe përmes forcës“, tha presidenti amerikan.
Hamasi liroi këtë të hënë 20 pengjet izraelite në Gaza. Në fillim u liruan 7 pengje dhe më pas grupi i dytë prej 13 pengjesh të cilët iu dorëzuan Kryqit të Kuq.
Në këmbim të pengjeve, Izraeli po liron 250 të burgosur palestinezë dhe më shumë se 1,700 të ndaluar – grupet e para kanë filluar të mbërrijnë në Ramallah në Bregun Perëndimor dhe Gazën e pushtuar.
Discussion about this post