Një shtetas italian është arrestuar në Tiranë nga efektivët e Komisariatit Nr. 6 dhe ata të Policisë Rrugore, pasi kishte vjedhur një automjet tip Audi Q5.
Vjedhja ndodhi në një rrugë dytësore, ku pronari i Audi-t sapo kishte dalë nga makina dhe e kishte lënë të ndezur.
Shtetasi italian ka hipur në automjet dhe është larguar menjëherë nga vendi i ngjarjes.
Ai ka përshkuar zonën e Astirit, ndërsa policia i është vënë në ndjekje. Gjatë ndjekjes, shtetasi italian ka kryer manovra të gabuara dhe është përplasur me disa makina.
Gjatë ndjekjes është lënduar edhe një punonjës policie, fatmirësisht pa plagë të rënda.
Në fund, shtetasi italian është arrestuar nga policia.
Nga verifikimet ka rezultuar se ai ishte nën efektin e drogës.
Njoftimi:
Tiranë/ Finalizohet operacioni policor i koduar “Last Escape”
Vodhi një automjet dhe, gjatë tentativës për t’u larguar, përplasi disa automjete dhe goditi një punonjës Policie, arrestohet në flagrancë 35-vjeçari italian.
Sekuestrohet automjeti i vjedhur audi Q5, që drejtohej nga 35-vjeçari, pa leje.
Pas marrjes së njoftimit se në rrugën dytësore Durrës-Tiranë, pranë një subjekti ishte vjedhur një automjet tip “Audi Q5”, shërbimet e Komisariatit të Policisë Nr. 6, në bashkëpunim me shërbimet e Komisariatit të Policisë Rrugore Tiranë, organizuan dhe finalizuan operacionin policor të koduar “Last Escape”, si rezultat i të cilit u bë i mundur kapja dhe arrestimi në flagrancë i shtetasit italian A. E., 35 vjeç, banues në Itali.
Nga veprimet hetimore të kryera dyshohet se shtetasi A. E., rreth orës 19:00 të datës 29.08.2026, ka vjedhur automjetin tip “Audi Q5” në rrugën dytësore Durrës-Tiranë.
Ky shtetas gjatë tentativës për t’u larguar, pas ndjekjes policore, ka përplasur disa automjete të tjera dhe më pas ka goditur me automjet një punonjës Policie, i cili si pasojë ka marrë dëmtime të lehta në krah.
Materialet i janë referuar Prokurorisë, për veprime të metejshme.
Discussion about this post