Ambasadorja amerikane Yuri Kim ka zhvilluar një takim me kreun e SPAK, Arben Kraja pas arrestimeve të fundit për skandalin me inceneratorët, ku në pranga përfundoi ish deputeti socialist Alqi Bllako.
Kim shprehet se ka përgëzuar prokurorët dhe hetuesit për punën, ndërsa shton se SHBA do të mbështesë Reformën në Drejtësi për të forcuar sundimin e ligjit.
“Sot u takova me Arben Krajen për të përgëzuar prokurorët dhe hetuesit që kanë prodhuar më shumë dhe më shumë rezultate reale në emër të publikut shqiptar. Rekordet në rritje të hetimeve, ndjekjeve penale, konfiskimeve të pasurive etj. tregojnë se askush nuk është mbi ligjin. SHBA do të vazhdojë të mbështesë fuqishëm reformën në drejtësi – duke përfshirë punën e SPAK – për t’i dhënë fund pandëshkueshmërisë, për të mbajtur përgjegjës zyrtarët e korruptuar dhe krimin e organizuar, për të forcuar sundimin e ligjit në Albania. Kjo është e nevojshme për të përmbushur kërkesat e BE-së, gjithashtu për t’iu përgjigjur kërkesave të të gjithë njerëzve për drejtësi”, shprehet Kim.
Kujtojmë se ambasadorja ka zhvilluar një sërë takimesh ditën e fundit në Kryesinë e Kuvendit me kryeparlamentaren Lindita Nikolla, dhe deputetët Taulant Balla dhe Enkelejd Alibeaj.
Discussion about this post