Një 60-vjeçar i shpallur në kërkim ndërkombëtar është arrestuar në Angli me qëllim ekstradimin drejt Shqipërisë. Bëhet fjalë për Sabri Sopotin, i dënuar nga Gjykata e Dibrës me 24 vite burg për veprën penale të vrasjes me paramendim, si edhe për mbajtje pa leje dhe prodhim të armëve, armëve shpërthyese dhe municionit.
Sipas Policisë së Shtetit, arrestimi u realizua në kuadër të operacionit ndërkombëtar të koduar “The Wanted”, falë bashkëpunimit dhe koordinimit mes Interpol Tiranës dhe Interpol Manchester.
Sipas vendimit të gjykatës, ngjarja për të cilën është dënuar Sopoti ka ndodhur më 24 dhjetor 1999, kur ai dyshohet se vrau me armë zjarri (automatik) shtetasin me iniciale B.K.
Autoritetet shqiptare bëjnë me dije se Interpol Tirana po vijon procedurat me homologët britanikë për finalizimin e ekstradimit të 60-vjeçarit drejt Shqipërisë, ku ai do të vuajë dënimin e dhënë nga drejtësia shqiptare.
Policia thekson se operacioni është pjesë e bashkëpunimit ndërkombëtar për lokalizimin dhe arrestimin e personave të shpallur në kërkim, me qëllim vënien e tyre përpara drejtësisë.
Discussion about this post