Pas arrestimit nga SPAK i 32 policëve në Morinë që shfrytëzonin postin duke marrë u ryshfet qytetarëve në këmbim të shërbimeve, me fitime që shkonin deri në 8 mijë euro në ditë, ka reaguar edhe kryeministri Edi Rama. Rama ka përgëzuar për punën e bërë, SPAK-un dhe Agjencinë e Mbikëqyrjes Policore, dikur SHÇBA, teksa thotë se kjo frymë bashkëpunimi duhet të vijojë. Ai vë theksin që operacione të tilla të vijojnë deri në zhdukjen e fenomenit të korrupsionit nga uniforma blu.
“Përgëzime SHÇBA-së dhe SPAK-ut për operacionin shembullor të goditjes së një çerdheje të korruptuarish në Policinë e Shtetit! Uroj që kjo frymë e cilësi bashkëpunimi të vazhdojë në funksion të fshirjes së çdo njolle që ndot uniformën e policisë” – shkruan Rama.
Në dosjen hetimore për 34 efektivët e policisë të vënë nën akuza të ndryshme që nisin nga shpërdorimi i detyrës, korrupsioni, apo edhe lejimi i kalimit të sendeve të paligjshme në kufi, SPAK ka administruar më shumë se 200 fashikuj. Nga hetimet autoritetet kanë dalë në përfundim se efektivët e policisë së pikës kufitare morinë i merrnin shuma monetare e personave të ndryshëm që hynin në territorin e Kosovës. SPAK thotë se ata i kanë kryer veprat penale në bashkëpunim, ku sipas burimeve policët merrnin 10-100 euro personave që kishin sende te paligjshme apo nuk plotësonin dokumentacionin e nevojshëm për të kaluar kufirin, ndërsa fitimet arrinin deri në 8 mijë euro në ditë.
Discussion about this post