Këshilli i Mandateve vendosi të shtyjë për ditën e mërkurë vijimin e mbledhjes ku po diskutohet mbi kërkesën e SPAK për arrestimin e deputetit Arben Ahmetaj.
Avokatët e ish-zv.Kryeministrit kërkuan në mbledhjen e sotme më shumë kohë në dispozicion për të realizuar mbledhjen, ndërsa u vendos që Këshilli të mblidhet në orën 16:00 të së mërkurës.
Gazment Bardhi në një prononcim për mediat tha se SPAK nuk ka paraqitur asnjë informacion shtesë që mund të legjitimonte zhvillimin e mbledhjes me dyer të mbyllura.
Bardhi e konsideroi të paligjshme shtyrjen e mbledhjes, duke u shprehur se vendimi nuk u mor me votim.
“Mazhoranca po ndihmon Arben Ahmetajn. Duke shtyrë seancën, atëherë Këshilli javën e ardhshme do ti drejtohet Kuvendit me një raport, çka mund të realizohej brenda kësaj jave, pa pasur nevojë për shtyrje”, tha Bardhi.
Sipas tij, përmes htyrjeve të tilla po i jepet mundësia Arben Ahmetajt që të fshihet. “Avokatët deklaruan se Arben Ahmetaj ndodhet jashtë vendit, por se ku ndodhej nuk dhanë sqarime”, tha Bardhi.
Sipas tij, nesër avokatët do të paraqesin mbrojtjen e tyre, megjithëse ne si Këshill nuk bëjmë gjyq. “Mendoj se kemi të bëjmë me një taktikë që Ahmetaj të fitojë kohë”, tha Bardhi.
Ai ka vlerësuar si shumë profesionale punën e SPAK lidhur me paraqitjen e provave dhe fakteve. “Ahmetaj duhej të ishte në burg që në 2020, por kemi një hetim të thelluar, pasi është shtrirë hetimi edhe te pasuria ndaj ish-zv.Kryeministrit”, tha Bardhi.
Discussion about this post