Kërkesa e SPAK që i kërkon Kuvendit autorizimin për arrestimin e deputetit Arben Ahmetaj do të shqyrtohet nga Kuvendi ditën e hënë.
Propozimi është bërë nga deputetët socialistë në Këshillin e Mandateve dhe Imuniteteve, ndërsa seanca e jashtëzakonshme pritet të mbahet të hënën në orën 17:00. Me shumë mundësi propozimi i hedhur nga socialistët do të miratohet në fund të mbledhjes së sotme të Këshillit.
Ndërkohë Këshilli do të zhvillojë një tjetër mbledhje ditën e premte për të diskutuar dhe hartuar raportin që do t’I paraqitet Kuvendit.
Nga opozita u kërkua që çështja të shqyrtohet në seancën e ditës së nesërme (13 prill), ndërsa Gazment Bardhi në një debat që pati me Lindita Nikollën tha se opozita e kishte gati raportin e saj.
Bardhi tha se PS nuk duhet të pengojë punën e SPAK, ndërsa akuzoi socialistët se me zvarritjen e çështjes po i japin kohë Arben Ahmetajt që të fshihet.
SPAK ka ngritur 3 akuza për Ahmetajn, që nga fshehja e pasurisë te pastrami i parave, ndërkohë që në dosjen e Prokurorisë Speciale përfshihen ndërhyrjet dhe favorizimet që ish-zv.Kryeministri i ka bërë Klodian Zotos dhe Mirel Mërtirit, që konsiderohen si kokat e inceneratorëve.
Sipas detajeve të dosjes së SPAK, jo vetëm Ahmetaj, por edhe Damian Gjikinuri ka përfituar nga pagesat e Klodian Zotos, në udhëtimet jashtë vendit si në Rumani dhe Austri.
Discussion about this post