Arrestimi i Berberit, emërohet drejtori i ri i ARRSH-së

Pas arrestimit të Evis Berberit, në krye të ARRSH-së është emëruar Gentian Gjyli, i cili mbante postin e zëvendës drejtorit.

Pas vë nies në  pranga të Berberit, Gjyli ka mbajtur kompetencat e drejtorit dhe drejton aktualisht institucionin.

Evis Berberi, i konsideruar një ndër njerëzit më të afër të zv.ministres Belinda Balluku, akuzohet për veprat penale “Korrupsioni pasiv i personave që ushtrojnë funksione publike”, “Pastrimi i produkteve të veprës penale apo i veprimtarisë kriminale”, kryer në bashkëpunim.  Bashkë me të janë arrestuar edhe Valter Begaj dhe Ervis Lami për kryerjen e veprave penale “Korrupsioni aktiv i personave që ushtrojnë funksione publike”, kryer në bashkëpunim dhe “Pastrimi i produkteve të veprës penale apo i veprimtarisë kriminale”, kryer në bashkëpunim.

Sipas SPAK, Valter Begaj, administrator i kompanisë Net Group SHPK, përfitoi 3 tendera në kohën kur Berberi ishte Drejtor i Përgjithshëm për Eficencën e Energjisë me vlerë totale 137.4 milionë lekë dhe 3 tendera të tjerë, me vlerë 101.8 milionë lekë, kur ai drejtonte ARRSH-n.

Tenderat e përfituar lidhen me konsulenca projektesh që janë fituar me çmim më të ulët nga kompania Net Group SHPK. Për fitimin e këtyre tenderave, kjo kompani rezulton se i ka kaluar në rrugë bankare mbi 223 milionë lekë kompanisë tjetër DAAM SHPK, e cila kohë më parë ka qenë në pronësinë e Evis Berberit zyrtarisht dhe sipas SPAK ai është pronar në hije.

LEXO EDHE:

“Të lashë një palë syze peshqesh”/ Mesazhet që fundosën Evis Berberin