Kryeministri Edi Rama është parë të dalë nga godina e Bashkisë së Tiranës, nën shoqërinë e nënkryetares Anisa Ruseti. Vizita vjen një ditë pas arrestimit të kryetarit Erion Veliaj, me urdhër të SPAK.
Pas arrestimit me urdhër të GJKKO, burime bëjnë me dije se brenda dy-tre ditëve, Erion Veliaj pritet t’i delegojë firmën njërit prej nënkryetarëve të bashkisë.
Gjatë një transmetimi drejtpërdrejt në Facebook në mëngjesin e sotëm, Rama u ankua se Veliaj u arrestua “pa gjyq” dhe se Tiranës “iu hoq koka”.
“Do të krijojmë një opinion të konsoliduar për aktakuzën për të cilën gjykatësi vendosi t’i heqi kokën Bashkisë së Tiranës. Bëhet fjalë për një proces hetimor shumë të çuditshëm, e nisur nga një novelë anonime, dorëzuar në shkurtin e kaluar në SPAK, që ka pjellë një roman prej 400 faqesh. U arrit në pikën që edhe një nënë e një fëmije 6 vjeç të dënohet me arrest shtëpie”, tha ndër të tjera Rama.
Rama deklaroi se po e ndjek me vëmendje çështjen e kryebashkiakut dhe se Partia Socialiste do të mbajë një qëndrim të drejtë.
Ndaj Erion Veliajt rëndojnë akuzat për “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Discussion about this post