Arrestimi i Fredi Belerit u diskutua në Komisionin e Senatit të Shteteve të Bashkuara për Marrëdhëniet me Jashtë. Kreu i këtij komisioni, Bob Menendez kërkoi informacion në lidhje me arrestimin e kryebashkiakut të sapozgjedhur në Bashkinë e Himarës, duke e quajtur një akt të tillë “shqetësues”, vetëm pak ditë para zgjedhjeve.
“Unë e kuptoj se garantimi i zgjedhjeve të lira dhe të ndershme është i rëndësishëm. Megjithatë, jam i shqetësuar. Greqia na ka informuar se do të ketë një ndikim të keq në procesin e integrimit të Shqipërisë në BE”, -tha Menendez.
Këshilltari i Departamentit të Shtetit të Shteteve të Bashkuara, Derek Chollet deklaroi se SHBA-të i kanë kërkuar më shumë informacion mbi rastin Ambasadës Amerikane në Tiranë, pasi janë informuar nga ambasadori grek.
Ndërkohë, Fredi Beleri do të dalë para Gjykatës të hënën. Struktura e Posaçme Kundër Korrupsionit SPAK do të përcaktojë nëse arresti i dhënë nga Gjykata e Vlorës është i vlefshëm, pasi gjykata në fjalë shpalli moskompetencë. Beleri u arrestua vetëm dy ditë përpara zgjedhjeve lokale, me akuzën për blerje votash. Arrestimi i tij shkaktoi tensione diplomatike mes Tiranës dhe Athinës, pasi ai është anëtar i minoritetit grek.
Zyrtarët e Greqisë kanë kërkuar që autoritetet shqiptare të lirojnë Belerin, përndryshe çështja do të ndikojë negativisht në procesin e integrimit europian të vendit.
Discussion about this post