Policia e Elbasanit ka dalë me një njoftim zyrtar pas lajmit të djeshëm lidhur me arrestimin e ish-kryeinspektorit të Inspektoratit Vendor të Mbrojtjes së Territorit, i cili akuzohet për shpërdorim detyre.
Mësohet se, në kuadër të operacionit të koduar “Llixha” është arrestuar ish-kryeinspektori Mark Qosja, banues në Elbasan, dhe një person me iniciale N. K., 50 vjeç, banues po në Elbasan, i cili ndërtonte po leje një objekt prej 1200 metër katror në zonën e llixhave.
Gjithashtu është proceduar penalisht dhe një inspektor i Inspektoratit Vendor të Mbrojtjes së Territorit në bashkinë Elbasan.
Sipas hetimeve të policisë, ka rezultuar se në muajin janar dhe shkurt 2021 të jetë bërë ndërtim pa leje me sipërfaqe 1200 m katror, në dy kate, nga N. K., në vendin e quajtur “Llixha”, dhe në vijim të jetë aplikuar për legalizim tek AKSH.
Po nga hetimet dyshohet se me veprimet apo mosveprimet e tyre, Mark Qosja dhe inspektori tjetër të kenë favorizuar këtë person për të kryer ndërtimin pa leje.
Materialet i kalojnë për veprime të mëtejshme Prokurorisë së Rrethit Gjyqësor Elbasan, për veprat penale “Shpërdorimi i detyrës” dhe “Ndërtim i paligjshëm”.
Discussion about this post