Këtë të mërkurë kanë rënë në prangat e policisë ndërkombëtare dy ish-truprojat e ish-ministrit Saimir Tahiri, emrat e të cilëve dolën në përgjimet e operacionit “Shpirti”. Hekuran Marku është arrestuar në Gjermani, ndërsa Agustin Deda në Francë.
Mesohet se, pas arrestimit, Agustin Deda ka kërkuar azil politik në Francë me arsyetimin se është i sulmuar politikisht në Shqipëri.
Kjo kërkesë i hap rrugë bllokimit të procedurave të ekstradimit, pasi në bazë të ligjeve ndërkombëtare, derisa të shqyrtohet kërkesa për azil ai do të qëndrojë nën masën e detyrimit për paraqitje dhe s’mund të lëvizë jashtë Francës.
Deda e Marku janë arrestuar pas hetimeve të operacionit “Shpirti”, ku SPAK i akuzon si të përfshirë në trafikun ndërkombëtar të drogës.
