Argita Malltezi (Berisha), bashkëshortja e Jamarbër Malltezit dhe vajza e ish-Kryeministrit Sali Berisha, tha mbrëmjen e sotme në emisionin “Top Story” se politika është pjesë e pandashme e jetës së saj.
Ajo e cilësoi si një rrëshqitje të rëndë të të gjithë sistemit që mban në këmbë shtetin shqiptar, të sistemit juridik shqiptar, arrestimin e Jamarbër Malltezit dhe vënien nën hetim të Sali Berishës.
“Është jo thjesht një sulm politik, por është një sulm politik i një prej shtyllave që mban në këmbë shtetin shqiptar, sulm politik i sistemit juridik”, tha Argita Malltezi.
Argita Malltezi (Berisha) tha se ka ruajtur çdo lloj dokumenti që ka lidhje me të ardhurat e saj, nga momenti kur ka nisur punën deri në ditët e sotme.
“Kjo është arma më e fortë që do të zbardhë të vërtetën”, tha Argita Malltezi.
Duke folur për arrestimin e Malltezit në aeroportin “Nënë Tereza”, ajo tha se nuk kishte arritur ta takonte.
“Zbrita nga avioni, fola me të, dhe pak minuta më pas më mori në telefon dhe më tha: po më arrestojnë. Më shkoi mendja te pushteti i Edi Ramës, nuk më bënte përshtypje veprimi i policisë, pasi diktohet nga pushteti i Edi Ramës, por ajo që më skandalizoi ishte se si mund të manipuloheshin të dhënat në një dosje të shkruar nga prokurorët.
“Personi i parë që fola pas arrestimit të Jamarbrit ishte vëllai, pasi nuk doja të shqetësoja prindërit”, tha Argita Malltezi.
Discussion about this post