Kreu i PD, Lulzim Basha ka reaguar pas arrestimit nga SPAK të ish-ministrit dhe deputetit të LSI, Lefter Koka. Basha tha nga selia blu se nuk është ish-ministri “peshku i madh”, por hodhi akuza drejt kryeministrit Rama dhe figurave të tjera të rëndësishme në PS.
“Arrestimi i sotëm i Lefter Kokës, është një tjetër prova që fakton denoncimet e PD-së. Ishte PD ajo që denoncoi në vitin 2018 për 400 milionë eurot që u janë zhvatur taksapaguesve shqiptarë. Arrestimi i ministrit të Ramës vërteton akuzat tona. Ne e dimë që ky nuk është peshku i madh, emrat e vërtetë që qëndrojnë pas kësaj afere janë të Edi Ramës, Damian Gjiknurit, Arben Ahmetajt, Klodian Zotos, Erion Veliajt dhe dy kryebashkiakëve të tjerë surrogato. Nuk mund të themi që është një ditë triumfi për drejtësinë, por është ndoshta fillimi i një procesi. Paratë e kujt po pastronte ministri i Ramës që është arrestuar sot”, tha Basha.
Basha përmendi dhe Komisionin Hetimor që PD ka ngritur për skandalin e Inceneratorëve, akuza të cilat vunë pas hekurave Kokën.
“Për këtë çështje është ngritur edhe Komisioni Hetimor, për të cilin i ka zënë frika. Po tregohet qartë që me refuzimin për t’u përgjigjur në kohë me dokumentet e kërkuara, fajtorët janë vetëzbuluar. Ky është moment për t’u thënë se kjo betejë do vazhdojë dhe pavarësisht prej vullnetit të plotë apo jo të drejtësisë të cilës i kërkoj të fillojë me arrestimin e kokave dhe jo të kënaqet me arrestimin e personave që kanë qenë pjesë e korrupsionit”, shtoi ai.
Urdhër-arresti ndaj ish-ministrit është lëshuar një ditë më parë, por është ekzekutuar sot dhe mban firmën e prokurorit Klodian Braho e gjyqtarit Erion Bani. Ndaj Kokës rëndojnë akuzat për shpërdorim detyre, pastrim parash dhe korrupsion. Bashkë me të janë arrestuar edhe 2 persona të tjerë, identiteti i të cilëve nuk dihet ende.
Discussion about this post