Shtetet e Bashkuara të Amerikës ofrojnë mbështetje maksimale ndaj Policisë së Shtetit. Mesazhi vjen në momentin më të nxehtë pasi ditën e hënë ish-Presidenti i Republikës, Ilir Metës u tërhoq zvarrë gjatë arrestimit pas urdhërit të lëshuar nga SPAK-u.
Opozita pretendon se agjentë të BKH-së të maskuar dhe pa numer identifikues kanë shkelur ligjin duke dhunuar kreun e Partisë së Lirisë.
Lufta kundër korrupsionit, krimit të organizuar, trafiqeve të paligjshme dhe terrorizmit, ishin në fokus të bisedës së drejtorit të Përgjithshëm të Policisë së Shtetit, Ilir Proda me shefin e Zyrës Rajonale të Sigurimit në Detyrë në ambasadën amerikane në Tiranë, Jonathan Ellis, sipas një njoftimi nga policia.
“Proda dhe Ellis vlerësuan bashkëpunimin e deritanishëm dhe konfirmuan gatishmërinë për ta thelluar këtë bashkëpunim. Ellis uroi Drejtor Prodën për detyrën e vështirë që ka marrë përsipër dhe e siguroi për mbështetjen e SHBA-së për Policinë e Shtetit dhe se bashkëpunimi i shkëlqyer dhe i veçantë i Policisë së Shtetit me Zyrën e Sigurimit Rajonal do të thellohet akoma më tej”, thuhet në njoftimin e Policisë së Shtetit.
Sic njofton zyra e shtypit e drejtorit të Policisë, Proda e siguroi Shefin e Zyrës Rajonale të Sigurimit në Ambasadën Amerikane se është i vendosur për të bashkëpunuar dhe punuar bashkërisht me agjencitë ligjzbatuese amerikane dhe ato në Ambasadën amerikane në Tiranë, duke treguar profesionalizëm e besueshmëri gjatë hetimeve dhe operacioneve të përbashkëta në luftë kundër korrupsionit, krimit të organizuar, trafiqeve të paligjshme dhe terrorizmit.
Discussion about this post