Policia ka arrestuar dy të rinj dhe ka shpallur në kërkim tre të tjerë, të dyshuar se kanë marrë peng dhe dhunuar një 27-vjeçar për t’i marrë 5 mijë euro.
Ngjarja ka ndodhur në një apartament, ku viktima është mbajtur për disa orë nën kërcënim dhe dhunë fizike, derisa ka dorëzuar shumën e parave. Më pas, autorët e kanë kanosur sërish për t’u marrë një shumë tjetër.
Në pranga kanë rënë 24-vjeçarët L. K. dhe A. N., ndërsa në kërkim janë shpallur tre bashkëpunëtorët e tyre: K. N., 23 vjeç, M. M., 21 vjeçe dhe S. C., 25 vjeçe.
Gjatë kontrolleve në banesën e njërit prej të arrestuarve, policia gjeti dhe sekuestroi një armë zjarri pistoletë me municion luftarak, si dhe 5 mijë euro, që dyshohet të jenë marrë nga viktima.
“Menjëherë pas njoftimit se një shtetasi i ishte hequr liria dhe ishte dhunuar, me qëllim dhënien e një shume parash, Sektori për Hetimin e Krimeve të Rënda, në bashkëpunim me Sektorin e Forcës së Posaçme Operacionale, ka organizuar punën për identifikimin dhe kapjen e autorëve, si dhe për zbardhjen e rrethanave të rastit.
Në kuadër të operacionit “Kufizimi”, shërbimet e Policisë identifikuan 5 autorët e dyshuar të rastit, u kapën dhe u vunë në pranga 2 prej tyre, shtetasit L. K., 24 vjeç dhe A. N., 24 vjeç, si dhe u shpallën në kërkim 3 bashkëpunëtorët, shtetasit K. N., 23 vjeç, M. M., 21 vjeçe dhe S. C., 25 vjeçe.
Nga hetimet e kryera me metoda proaktive dyshohet se këta 5 shtetas kanë bashkëpunuar me njëri-tjetrin, për t’i marrë para, 27-vjeçarit. Shtetasit L. K., M. M. dhe K. N. i kanë hequr lirinë, për disa orë, 27-vjeçarit, dhe e kanë dhunuar fizikisht atë, në ambientet e një apartamenti. Pasi 27-vjeçari iu ka dhënë 5000 euro, ata e kanë kanosur sërish atë, që t’iu jepte një shumë tjetër parash”, njofton Policia.
Discussion about this post