Shisnin kokainë dhe kanabis në plazhet e Himarës, arrestohen tre persona

Tre persona janë arrestuar nga policia, pasi dyshohet se shpërndanin doza kokaine dhe kanabisi në zonat turistike të Livadhit dhe Llamanit.

Sipas policisë, dy prej personave të arrestuar kishin marrë banesa me qira në Himarë, ku dyshohet se ushtronin aktivitetin e paligjshëm të shpërndarjes së lëndëve narkotike.

“Kontrollet intensive gjatë sezonit turistik, goditen raste të tjera të shitjes së lëndëve narkotike në zona bregdetare, që shisnin doza kokaine dhe cannabisi në plazhet e Livadhit dhe Llamanit, si dhe në zona të tjera të Himarës”, thuhet në njoftimin e Policisë.

Gjatë fazës së parë të operacionit, të koduar “Area 01”, u arrestuan në flagrancë V. K., 17 vjeç, banues në Himarë, dhe D. Gj., 40 vjeç, banues në Tiranë.

Gjatë kontrolleve fizike ndaj tyre dhe kontrollit në banesën ku 40-vjeçari qëndronte përkohësisht në fshatin Llaman, policia gjeti dhe sekuestroi sasi të dyshuara kokaine dhe kanabisi, të ndara në 60 doza të gatshme për shitje.

Sipas hetimeve paraprake, këto doza dyshohet se do të shpërndaheshin në plazhet e Livadhit dhe Llamanit, si dhe në lokalet pranë tyre.

Ndërkohë, në fazën e dytë të operacionit, u arrestua R. L., 24 vjeç. Gjatë kontrollit të automjetit me të cilin lëvizte dhe banesës ku qëndronte përkohësisht në Himarë, u gjetën 31 doza kanabisi të përgatitura për shitje, si dhe një peshore elektronike.

Në total, gjatë operacionit u sekuestruan 91 doza me lëndë narkotike, një peshore elektronike, një automjet dhe një celular.